Sunday Times egunkari britainiarrak dioenez, Googlen egiten den bilaketa bakoitzak zazpi gramo CO2 sortzen omen du. Joan den urtean zerbitzua ostatatzeaz arduratzen den Strato enpresak ere antzeko zenbakia aitatu zuen, baina egunkari britainiarrak kalkulua nondik nora egin duen argitu du.
 
2006-2007ko epean eguneko 280 milioi bilaketa egiten ziren Googlen. Bilaketa horietan 450.000 zerbitzarik parte hartu zuten eta horien kontsumoa 400 kWh denez, bilaketako hamaika watt kontsumitzen direla estimatzen da. Watt horiek zer CO2 kantitateri dagozkion jakiteko, kontuan hartu behar da ez dela gauza bera iturria ikatza edo energia nuklearra izatea, adibidez. Ikatzetik sortutako kWh bakoitza 500 gramo CO2-ren baliokidea da, energia nuklearretik sortutakoari 80 gramo baino ez dagokio. Beraz, Googlen egindako bilaketa bakoitzari zazpi gramo CO2 egoztea hipotesi txarrena da, hots, energia iturritzat ikatza hartzea.
 
Aldiz, Googlek dio benetako energia kontsumoa bilaketako 0,2 gramo CO2ren baliokidea baino ez dela, eta bera dela bere zerbitzarien benetako kontsumoa zein den ongien dakiena. Aparatuen elektrizitate-kontsumoa neurtzen duen softwarea garatze bidean duela (www.google.org/powermeter/index.html) iragartzeaz gain, energia berriztagarriekin duen konpromisoa indartuko duela azpimarratu du.
 
Gai honek eztabaida bati hasiera eman dio zientzian: teknologia berrietatik eratorritako tresnen eraginez zenbat berotuko da Lurra?