25 urte egin ditu Argiak euskal kulturaren nondik norakoak Urtekariaren bidez argitara ematen. Norabide berri bati ekin dio aurtengoan, analisi, kritika eta iritziaren ildotik, batez ere. Horrela, 2008ko kultur gertakizunak errepasatzen dituzten ohiko osagaiez gain, datozen urteetan nagusituko diren joeren berri izango du irakurleak.
 
Analisi artikulu zorrotzekin eta ilustrazio kritikoekin –Antton Olariaga eta Alai Zubimendiren eskutik– 2009ko joerak azpimarratu dituzte kulturgintzan zer esatekorik duten sinadura ezagunek. Horrez gain, iaz kultur esparru ezberdinetan jardun zuten hamar pertsona nabarmendu ditu Argiak Urteko Pertsonak izeneko sail berrian.
 
Urtekaria, erreferentzia sendoa bilakatu da 25 urte hauetan, euskal kulturaren ertz guztiak ezagutzea eta bahetzea baitu xede. Zeregin horri loturik, kultur arlo bakoitzari errepasoa egiten dion artikulu bana irakur daiteke betiko legez; izen berriak ekarri ditugu aurten gainera: Itxaro Borda idazlea, Joxi Basterretxea EHUko irakaslea, Aritz Zerain Bertsozale Elkarteko koordinatzailea, Maite Goñi IKTeroak proiektuko koordinatzailea, Maite Alvarez Bermeoko euskara teknikaria, Bego Vicario zinemagilea eta Xabier Gantzarain arte kritikaria. Bestalde, 2008an bezalaxe, Urtekaria Interneten kontsultatu ahal izango dute harpidedunek argia.eus/urtekaria helbidean –egunez eguneko bilaketak egiteko aukerarekin–, eta maiatzetik aurrera nahi duenarentzat zabalik izango da ataria.
 

Iruzurren urtea

Nerea Azurmendi kazetariak 2008a lausotu duten hainbat iruzurren kasuan sakondu du artikulu zabal eta kritiko batean. Hau da ondorio nagusietako bat: “Orokorrean, ondarearen eta kultur azpiegituren kudeaketa publikoa non, arazoak han. Ez da kontabilitate maltzurra, estatistika soila baizik”.
 
Bestetik, Iñigo Aranbarri idazleak fikziozko bidaia egin du Euskal Herrian barrena Roberto Arlt bidaide duela. Horrela, kazetari argentinarraren begi argiek herri euritsu baten kultur panorama bistarazi dute.