Salas y galerías de arte en San Sebastián 1878-2005 lanari ekiteko 1863. urtera, Donostiako harresiak suntsitu zituzten garaira, itzuli ditu begiak Juan Antonio García Marcosek. Garai hartan euren artelanak etxean erakusteko ohitura ei zeukaten artistek, Donostiako Hernani kaleko 3. zenbakian El Pinar erakustokia ireki zuten arte. 1878an izan zen hori. Geroztik hamaika leku erabili izan dira eginbehar horretarako: arte ederrak jendaurrean azaltzeko espresuki eratutako sala eta galeriez gain, askotxo izan baitira asmo berarekin artelanei leku egin izan dieten hotelak, dendak eta ostatuak. Ugari dira, era berean, artelan horien atzean dauden artistak, baita babesle eta zaleak ere.