Hasier Etxeberria idazle eta kazetariak Alua Mundua! blogean Lourdes Mendez arte antropologoak Berrian (2008-02-27) esandakoen harira (ikus ARGIA 2.127): "Ez dut nik ukatuko emakumea ez denik egon bazterturik plastikaren historian (eta literaturan, eta beste hainbat alorretan), eta eginahalak egin behar direla horri aurre egiteko (...) Baina, nik dakidala –eta barkatu konparaketa hain maskulinoa–, futboleko Espainiako Ligako Lehen Mailan ere, ez du inongo emakumek golik sartu sekula. Azter dezagun horren zergatia eta bidegabekeria, hala nahi baldin bada, eta jar diezaiogun erremedioa, baldin badakigu nola, baina ez dezagun uka orain arteko golak sartu dituztenak gizonezkoak izan direnik, gezurra litzateke eta. Ez ditzagun nahasi antzarak eta ferrak".

Victor Moreno irakasle eta idazleak Berrian: "Obraren eta irakurlearen arteko bitartekariak direla erraten duten kritikariak gezurretan ari dira. Merkatuaren eta irakurlearen artean dago gaur egun kritikaria (...) Kritikariak, finean, publizista bilakatu dira".