ARGIA.eus

2020ko irailaren 28a
Gazte Egonaldiak 07

Graffitiak, film laburrak eta irratia

  • Hala Bedi irratiko estudioetan sartuko dute muturra, graffitietan trebatuko dira eta kamara hartu eta film labur bat sortzen ahaleginduko dira. Arabako Ikastolen Elkarteak behintzat, hori dauka prestatuta 12-17 urte arteko gaztetxoentzat uda honetarako,
    beti ere euskarara hurbildu nahian.

    Arabako Ikastolen Elkarteak Euskal Herriko zazpi probintzietako 12 eta 17 urte arteko gaztetxoei helarazi nahi dien mezua hauxe da: Aisian ere euskaraz, gozatu ere euskaraz. Aisialdian ere, euskaraz egin daitekeela erakutsi, euskaraz ere gozatzeko aukerak badirela baieztatu eta euskarak, eskolaz kanpo, bere tokia duela ikusarazi.
Maddi Soroa
2007ko uztailaren 01a
Nagore Amondarain
Maddi Soroa
Helburu hori ardatz izanik, Arabako Ikastolen Elkarteak Gazte Egonaldiak izeneko proiektua jarri zuen abian pasa den otsailean. Gazteak eta euskara uztartzeko asmoz, euskararekiko motibazioan eta erabileran eragingo duten egonaldiak prestatzen hasi ziren. Egonaldi horiek udan izango dira Bernedon. Uztaileko bigarren astean 12 urtetik 14 urte artekoentzako txanda izango da eta hirugarren astean, berriz, 15etik 17 urte arteko gazteentzako.

Proiektua martxoan eman zen ezagutzera ikastolaz ikastola. Gazteei gonbitea luzatzeko ikus-entzunezkoak erabili dituzte egonaldien asmoetako bat horixe delako, ikus-entzunezkoen bidez euskarara hurbiltzea. Beraz, blogak erabili dituzte informazioa zabaltzeko eta www.youtube.com web gunean gonbite bideoa zintzilikatuta dute. Egonaldietan parte hartzeko izen-emate epea apirilaren 20an amaitzen bazen ere, egun hori iristerako, lehen txandarako ez zegoen tokirik. Arrakasta ikusita, Arabako Ikastolen Elkartea Gazte Egonaldien proiektua urte osora zabaltzeko prestatzen ari da.

Bernedoko egonaldien helburuei dagokienez, zera uste du Nagore Amondarain, Arabako Ikastolen Elkarteko kide eta Gazte Egonaldien antolatzaileak: “Aisialdian euskararen gaiari sustraitik eusten dion proiektua da honakoa. Adin horretako gazteek erreferenteak imitatuz jokatzen dute sarritan, beraz, guk euskarazko erreferenteak eman nahi dizkiegu eta ahaleginak egin behar ditugu eredu horiek arrakastatsuak izan daitezen”. Gazteen euskararekiko motibazioan eta jarreretan eragin nahi dute antolatzaileek eta proiektu berritzailea eta modernoa eskaintzen saiatu dira.

Gazteentzako hutsunea

Garrantzi berezia eman nahi diote Gazte Egonaldietan parte hartuko duten gazteen adinari. Amondarainen iritziz, “gutxi dira 12 eta 17 urte arteko tarteari jaramon egiten dieten euskara sustatzeko egonaldiak. Horregatik, udako egonaldietan adin tarte hori betetzera gatoz, garrantzi handiko garaia baita; adin tarte horretan hasiko dira hizkuntza portaerak finkatzen, harreman berriak egiten, zaletasunak definitzen... eta guk bizitzako etapa berri hori euskaraz gara eta defini dezaten nahi dugu”.

Haurrak ez baizik eta gazteak, udalekuak ez baizik eta egonaldiak. Bernedoko protagonistak beraiek izango dira, gazteak. Zazpi probintzietakoak elkartuko dira, herri oso euskaldunetakoak nahiz ez hain euskaldunetakoak. Begiraleek, horixe, begirale lana egingo dute eta gazteak izango dira euren proiektuen arduradun.
ARGIAn egiten dugun kazetaritza independenteak bultzada merezi duela uste duzu?

Informazio askea lantzen dugu ARGIAn, langileok gara proiektuaren jabeak eta gure informazioen atzean ez duzu sekula multinazionalik, bankurik edo alderdi politikorik topatuko. Gure ustez, burujabetza guztien oinarrian dago informazio burujabetza, ezagutzen dugunaren gainean pentsatzen eta erabakitzen dugu. Horregatik diogu kazetaritza independentea dela demokraziaren oinarrietako bat.

Aldizkaria paperean etxean edo e-postan PDFan jaso nahi duzu? Pozik hartuko zaitugu ARGIAko komunitatean. ARGIAkoa izateko, nahi eta ahal duzun ekarpena egin dezakezu, eta bueltan egoki ikusten duzuna eskatu. Indartu dezagun indartzen gaituena!


Azkenak

ASTEKARIA
2007ko uztailaren 01a
Azkenak
EGILEA
Argia buletina
Egunaren laburpena
zure e-postan
Eguneraketa berriak daude