Price, eta bere taldeak, Afrikako ekialdean sortutako ekaitzek eragindako uhinak aztertu zituzten. 2005 eta 2006 urteetan egin zuten ikerketa –gogoratu beharra dago 2005ean hogeita zortzi ekaitz tropikal sortu zirela eta 2006an hamar–. Ikerlariak konturatu dira bi urteotako proportzioan gertatu zirela ekaitzak Karibe aldean.

‘Harreman transozeanikoen’ gainean izan dugu hau baino lehenago albiste harrigarririk. Berriki argitara eman den ikerketa baten arabera Amazoniako baso tropikalak behar duen ongarrietatik erdia Afrikako basamortuetatik eramaten du haizeak.

Etanola ez da oro urre

Arnas-aparatuko gaixotasunak orain baino askoz ere jende gehiagok sufrituko lituzke ibilgailu guztiek etanola erreko balute. Hori da behintzat Stanford (AEB) unibertsitateko Mark Z. Jacobson ikerlariak dioena.

Gasolinaren ondoan etanola ingurugiroarentzat askoz hobea dela oso zabaldutako ideia da eta Jacobsonen lanak ezbaian jarri du hori. Oso eredu informatiko konplexua erabili du 2020an AEBetan airearen kalitatea simulatu ahal izateko. Berak dioenez, gizakiarengan erregaiek duten eragina ez da soilik erregaien osagaien araberakoa. Inguruko faktoreak ere kontuan hartu behar dira, hala nola: tenperatura, eguzki erradiazioa, lainotasuna, haizea eta euria, besteak beste. Aldagai horiek guztiak kontuan hartuta egin du irakasle horrek Los Angelesen –bertan biltzen da AEBetako biztanleriaren %6– hemendik hamairu urtera izango duten airearen simulazioa.

Emaitzak harrigarriak izan dira; gasolina erreaz isurtzen diren substantzia kantzerigenoen kopuru antzekoa isurtzeaz gain ozono troposferiko (smog) askoz gehiago isurtzen du etanolak eta ozonoa arnasteak asma, biriketako minbizia eta sistema inmunologikoaren ahultzea ekar ditzake. Ez dugu ahaztu behar urtero munduan smog-a arnasteagatik 800.000 pertsona hiltzen direla.