Urtebete honetan taularen gainean etengabe aritu dira dantzan su-eten aldarrikapenaren aurretik ETAren eta Gobernuaren artean ustez egondako konpromisoak. Ezker abertzalearen bertsioa ezaguna da, baina Espainiako Gobernuak beti ukatu ditu konpromisoak. Joan den igandean Alberto Suriok El Diario Vasco-n idatzitako kronikan, iazko su-etena ETAren eta PSEren arteko metodo akordio baten ondorio izan zela adierazi zuen, eta akordio horretan Batasunak hauteskundeetan parte hartzea aurreikusten bazen ere, eduki politikoak alderdien mahaiaren gainean utzi zirela. Suriok iturri onak ditu sozialisten artean, besteak beste Jesus Egiguren bera, ETArekiko harremanetan PSOEren ordezkari izan ei dena. PSE aipatzen du Suriok eta ez Espainiako Gobernua, Jose Luis Rodriguez Zapatero babesteko sozialisten beste neurri bat izan daitekeena, baina bistan da Egigurenek zein ordezkatzen duen, areago gainera ezaguna denean honek Espainiako gobernuburuarekin duen harreman zuzen eta estua.

Lau urtean atentatu hilgarri bakarra egin du ETAk, eta gainera hildakorik eragiteko borondate zuzenik barik. Hori bera bakarrik, irtenbidea lortzeko bere ahalegin handiaren isla da; baina, aldi berean, atentatu bakar horrek adierazten du oraindik ere ENAMen borroka armatuari ematen zaion garrantzia zein den. Negoziazio mahaiak gehiago ematen ez duenean, armek desblokeoa bultza dezaketela uste da. Armen eraginkortasunaren azken bultzadan sinesten da, armak eurak isilarazteko besterik ez bada ere.
 
Zeren truke, ordea? Arnaldo Otegik Espainiako Gobernuak preziorik ez duela ordaindu behar esan badu ere, argi dago prezioa EAEko eta Nafarroako herritarren erabaki eskubidea dela. Preziorik ez balego, ETAk jardun armatua besterik gabe alboratuko luke eta kito. Baina XXI. mendeko sasoi hauetan, hori ez da jada nahikoa mende erdiko gatazka armatuari amaiera emateko. Gertatuko balitz hobeto, baina ETAren eta ENAMen historiak erakusten du erakunde armatua ez dela txantxetan ibiltzen eta, beraz, sinesgarritzat jo behar dela bake prozesuak aurrerapenik ez badu, berriz kolpatuko duela: denbora honetan izugarri aurreratu bada ere, hori da urtebete honetako laburpenaren laburpena.
 
Eta BECeko ezker abertzalearen ekitaldiaren atarian zer? Bada, ekimen berria aurrera ateratzen ez bada, EHAK behinik behin hor izango da azken aukera gisa.