Homosexualitatearen gaia ardatz duen Aita-semeak eleberria 1995ean argitaratu zen aurreneko aldiz, Aitor Aranak bere Onan ezaguna plazaratu baino bost urte lehenago. Hiriak berrargitaratutako liburuak aitaz maitemintzen den semearen istorioa kontatzen du. Aita bisexuala da, eta familian hori aitortzeko inongo eragozpenik ez du. Gaztetan urrats kalpartsuak eman zituen -prostituitzera ere ailegatuz-, baina gerora lasaitu zen. Haatik, hain zuzen ere gazte garaian ezagututako pertsona batek ekarriko dio zorigaiztoa. Semeaz maiteminduko da aurrena pertsona hori, gazteak bere maitasuna arbuiatzen duelako zeharo zapuztuko da hurrena, eta gerora aitaz, bere gaztetako lagunaz maiteminduko da. Ondorio lazgarriak ekarriko ditu horrek.

Errusiako Orelen jaio eta Finlandian hil zen Leonid Nikolaievitx Andreiev (1871-1919) idazl gai nagusiak zorotasuna, heriotza, beldurra eta bakardadea dira, eta giza arrazoimenaren indarrari eta mugei buruzko polemika luzea izan zuen bere aurreneko lanengatik hainbeste mirestu izan zuen Gorkirekin. Euskaratutako liburuan, Zazpi urkatuak kontakizunean, auzitegi militar batek kondenatu dituen bost iraultzaileren eta bi gaizkile arrunten azken egunak kontatzen ditu. Ilunpeak-en, berriz, polizia atzetik duen ekintzaile batek gordetako prostituzio etxean izandako bizipena, eta Espektroak narrazioan, zoroetxe batean gertatzen dena.

Eider Rodriguezek euskaratu du judu familia aberats batean jaiotako Irene Nemirovsky idazlearen Dantzaldia lana. Aldi berean, 1903an Kieven sortu eta 1942an Auschwitzen naziek erail zuten idazlea egungo irakurleari aurkezten dio Rodriguezek. Idazlearen amak ez ei zuen bere alaba begien aurrean ikusi ere egin nahi, zahartzaroaren gainbehera gogorarazten ziolako, eta Irene Nemirovskyren haurtzaro eta nerabezaroko urteak ez omen ziren oso zoriontsuak izan. Hori izan daiteke hain zuzen Dantzaldia narrazioan islatzen duen mendekuaren ardatza. Gurasoek, aurreneko aldiz, antolatu behar duten 200 gonbidatuentzako dantzaldira joatea debekatu egingo diote amarekin batere ondo konpontzen ez den hamalau urteko neskari. Neskak denik eta ezer baino gehiago desio du dantzaldian izatea. Hortik bere mendekua.

Iruñeko Udalak Haur Literatur Lehiaketako 2005eko edizioan ipuin eta komiki sailetan gailendu ziren haurren lanak plazaratu ditu. Askotariko lanak egin dituzte: ipuin ilustratuak, zuri-beltzezko komikikiak, komiki koloredunak... Ezin, bada, guztien zehaztasunak hemen jaso, baina hauexek dituzue komiki formatuko liburuxkan aurki ditzakezuen ipuin eta komikien egileak: Jon Larraza Ruiz de Larramendi, Idoia Belasko, Irati Baztan, Ekaitz Berrade Campion, Jon Bienzobas, Ainhoa Nagore Hermoso de Mendoza, Jokin Salegui Diez, Maialen Oyeregui, Adur Moreno, Garazi Otxoa Etxegarai, Adrián Iglesias Martín, Alaia Ardanaz Biskarret, Izaro Berasategi, Maialen Aldunate Sainz, Naroa Serna Romero, Ainara Eneriz, Iñaki de la Iglesia Nagore, Iratxe Durán, Ander Goñi, Garazi Otxoa, Ekaitz Zabalza eta Julen Sadaba.

Duela ez asko zendu zen Joxemartin Apalategi antropologoaren burutazioari esker sortutako liburua da Aitona gurearen Makilakixki. Bertan, bere aitona Felipek 1921ean Joxemiel Barandiaran auzokideari eskainitako kontu zaharretako bat aztertzen dute hainbat apalategitarrek: Joxemartinek antropologiaren ikuspegitik, M. Jaione Apalategik, berriz, ipuinaren ibilbide pedagogikoa eskaini du, argitalpen andana izan baitu eta ikastoletan zein ikastetxeetan dezente erabilitakoa da. Jokin Apalategik gaur egungo psikosoziologiatik kontu zahar horren muina den justiziaren gaiaz zer ikaskizun atera iradokitzen du. Eta Ur Apalategik bere osaba Joxemartini agur esaten dio.

Orrialde garbigarriak eta ertz biribilduak dituen Katalin udan liburuxka etxeko gazteenei zuzendua dago, beraiek irakurtzeko, edo narratzaileen papera helduren batek egin dezan. Nolanahi ere, marrazki handi bezain adierazgarrien ondoan agertzen den kontakizun urria letra larriz idatzia dago. Zer kontatzen duen? Katalinek udan egiten duena: sasoi horretan nola janzten den, amatxok txapela eta krema jartzen dizkiola eguzkitik babesteko, zertara jolasten den, uretan nola dabilen eta bitartean bere nebatxoak nola egiten duen lo.