Tamarindoaren mamia


2021eko uztailaren 16an

Milazka edo tamarizak geure itsasertzeko errio eta paduretako basa beltzetatik lorategi dotoreetarako urratsa emana du aspaldi. Urratsa ez nolanahikoa, horregatik! Dotoreenatzat jotzen diren tokietan topatuko dituzu milazkak, maiz itsasoari begira nonahiko hondartzan edo etxe inguruan: garai batean Iruñeko Gaztelu Enparantzan. Miarritzen, Getarin, Zarautzen, Hondarribian eta Donostian.

Eta Donostian prostituitu zuten. Zurikeriaren gaineko bitsetan eraikitako hiri horretan itxurazkoak baino itxurakoak gehiago balio du eta izanak baino izenak. Milazkari izena aldatu eta tamarindoa deitzen diote. Espainieraz pentsatu eta bizi direnen artean tamarindoak badu metropolitarraren ñabardura koloniala: tropikoa eta bertako bizimoduaren usaina dakar baina ez uztarri bakarrean, potrojorran aginduz bizi direnen kiratsari lotua baizik. Con olor a pulpa de tamarindo (tamarindo-mami usaiaz) du izenburua Madrilgo kazeta batean Donostiaz argitaratutako artikulu batek... Gezurra da Donostia, gezurrezko tamarindoak hiriaren ikur...

Lekadun jende artekoa da tamarindoa (Tamarindus indica) eta leka beraren barrualdeko mamia da ustiatzen dena. Tamarindo-mamia Ertamerikan eta Asia monzonikoan erabiltzen da, gozokiak eta saltsak egiteko batik bat: kurria dela, txutneia dela, Worcestershirea dela... Azken honen istorioa Donostiako sasi-tamarindoenaren antzekoa da: Indian sortua, kolonizatzaileen hiri horretan ontziratu omen zuten lehenengoz saltsa eta hango izena eman... Saltsa hau gabe Bloody Marya, Caesar, Sid Vicious eta antzeko koktel mordo bat ez lirateke izango...

Indian tamarindoaren azpian lo egitea txarra dela diote, gaueko hezetasunarekin lurrun garratzak askatzen omen ditu... Garai batean malenkonia eta eroaldi, eldarnio eta frenesia osatzeko erabili izan da eta, batik bat, purga edo libragarri gisa.

Tamarindoaren gezurraren bidetxurretik Donostiarako ideia turistiko batzuk: Worcesterrekin anaikidetu eta tamarindoen azpian lo egiten duenari tamarindo-mami gozokia edo koktelen bat dastatzera eman. Milazkak tamarindo, donostiar garun batzuk garbituko dituen purgarik ez da sortu oraindik...


Azkenak
Ukrainak Europar Batasuneko armamentuarekin Errusiako lurraldeari eraso egitea babestu du Borrellek

Borrellen hitzak azken asteotako eskalada elikatzera datoz. Azkenaldian Mendebaldeko hainbat agintarik egin dituzte adierazpenak zentzu berean. Errusiak iragan astean ohartarazi zuen Ukrainari beren armamentua Errusiako lurraldearen aurka erabiltzeko baimena ematen dioten... [+]


Herriari bizitza ematen dion Zigako eskolak itxi egin beharko du ume faltagatik

Lehen Hezkuntzako adin ezberdinetako zortzi ikasle baino ez ditu Zigako (Nafarroa) eskolak. Aukera baliatzen dute elkarbizitza lantzeko, tokiko curriculuma sustatzeko, landa ingurunea pedagogikoki aprobetxatzeko eta herria bera bizi eta dinamiko mantentzeko. Hori bai, ume... [+]


2024-05-28 | ARGIA
Hil egin da iragan astean Bergaran zauritutako langilea

Iragan asteko ostegunean zauritu zen larri Bergarako (Gipuzkoa) Embalan 3 lantegiko langilea, zama bat gainera erorita. 2024 urtean hiltzen den 26. langilea da.


Eguneraketa berriak daude