Maiatzaren 16an eratuko da Eusko Legebiltzar berria eta ekainaren erdialderako Gobernua eratua egon daitekeela aurreikusten du Ibarretxe lehendakariak. Aurreko legealditik bi auzi jasoko ditu oinordeko gisa oraingo Legebiltzarrak: lehena eta handiena, Atutxa, Knörr eta Bilbaoren auzia. Bigarrena letratu nagusiarena da. Auzitegi Gorenarekin izandako auzia medio, aurrekoak -Eduardo Mancisidor- 2003ko uztailean dimititu zuen eta oraindik ez da ordezkorik. Letratu nagusia, Legebiltzarreko kargu juridiko nagusiena da, eta hautatu politikoetatik aparte, kargurik garrantzitsuena. Legebiltzarreko zuzendari orokorraren gisako bat da.