Argitalpenak


2004ko abenduaren 05an


Palestina, zure mina
Begoña Bilbao
Elkar
118 orrialde
8,25 euro

Palestinako egoeraren saminaz

Begoña Bilbaok Elkar argitaletxearen eskutik plazaratu duen nobela honek Palestinak gaur egun bizi duen egoera ankerra du ardatz nagusi. Konorterik gabe hainbat denbora pasa ondoren, buruan kolpe izugarria jasotako emakume gazte bat Gazako ospitale batean esnatzen da, non dagoen eta bera nor den ere ez dakiela. Galderei arabieraz zein hebraieraz erantzuteko gai da, eta horrek beste galdera korapilotsu bat sortzen dio: Palestinarra ote da? Israeldarra? Izan ere, inguruan dauzkan zauritu gehienak palestinarrak diren arren, sendagilea israeldarra.da. Hospitale horretan lan egiteko jende beharrean direnez, bertan gelditzeko aukera ematen diote, eta oroimena itzultzen doakion heinean, gertatzen ari denaren kontzientzia hartuko du.

Gandhi, bizitzaren maisua
Batzuen artean
Saure
32 orrialde

Bakearen aldeko II. Fernando Buesa Blanco saria

Saure argitaletxeak kaleratutako komiki honek bakearen aldeko II. Fernando Buesa Blanco saria eskuratu zuen. Liburuan agertzen diren istorio guztiak Mahatma Gandhi eta haren irakaspenekin daukate zerikusia eta Atlantikoaren alde bietako hamar komiki marrazkilarik eginak izan dira »argentinarrak, brasildarrak, espaniarrak eta frantsesak ere badira haien artean». Horietatik zortzik gidoi bat ilustratu dute, eta beste bik testu bat irudi bidez berrinterpretatu. Hauxek dira istorioen izenburuak: Egia jainkoa da, Gatazkari buruzko jarrera, Indarkeriaren gurpila, Ehun milioi herrixka, Egia jainkoa da, Bestea, Egiarekiko atxekimendu sendoa, Justiziaren armak, Ehun milioi herrixka eta Zer da bakea?

Clitemenestra-ren itzulera
Alaitz Olaizola Borda
Kutxa Fundazioa
69 orrialde 4 euro

Donostia Hiria antzerki saria

Kutxa Fundazioak urtero antolatu ohi duen literatur lehiaketan Alaitz Olaizola Bordaren Clitemenestraren itzulera antzezlanak eskuratu du 2004.ean antzerki saria. Barruko harrak janda dagoen gaur egungo emakume baten etxean duela 2500 urteko Grezian bizi zen Clitemenestra agertuko da bat-batean, eta gertatutakoari zentzua aurkitzen saiatuko dira emakume biak. Ez da batere erraza izango, greziarrak ezin duelako gaurko emakumearen ingurua ulertu, ez eta emakume horrek Clitemenestraren etorrerara egokitu ere. Eta biak bakarrik egoteko aukera izango balute, behintzat! Baina hori ere ez dute lortuko, orainaldiko emakumearen senideak, lagunak eta auzokoak etengabe agertuko zaizkielako, dagoeneko zaila den egoera gehiago zailduz.

Eseté
Batzuen artean
Amasté Comunicación s.l.
130 orrialde
5 euro

Ez gozatzea debekatuta

Eseté aldizkariaren azkenengo zenbakia munduan zehar aginduz galarazten diren hamaika gauza eta ekintzei eskainia dago. Eta egia esan, ondo bitxiak dira Proyecto Cartelek daukan web orritik jasotako iruditan agertzen diren debeku asko: nahitaez ate baten eskuineko aldetik irtetera derrigortzen duena; armekin zein haurrekin barneratzea debekatzen duena; egoitza pribatua dela-eta, arren, hara ez sartzeko agintzen duen hotelarena; bertan geldituz gero, ala pixa edo bestelako beharrak egiten harrapatzen bazaituzte errebolber tiro batekin mehatxatzen zaituena; etxe hartakoak katolikoak direla-eta, Kristo Erregeri eta Jaungoikoaren Ama Guadalupekoari goraka protestante eta bestelako sekten propagandari uko egiten diotenena, edo zakurrari bere jabea hezitzeko eskatzen diona.

Klase borroka Europar Batasun berrian
Batzuen artean
Ipar Hegoa Fundazioa
48 orrialde

Eraikuntza europarrerako estrategia sindikala

LAB sindikatuaren Ipar Hegoa Fundazioak sortutako Haritik aldizkarian agertutako lan honen izenburua Klase borroka Europar Batasun berrian: eraikuntza europarrerako estrategia sindikala da. Aurten Sokoan burututako Ezkerra Europaren atarian lemapeko nazioarteko jardunaldietan aurkeztu ziren ekarpenetako bat dugu. Globalizazio neoliberalak klase gatazkan dituen eraginak, kapital transnazionalak ezarritako dominazio sisteman eragiten duten kontraesanak, egungo errealitate sindikalaren diagnostikoa edo itun konstituzional europarrari uko egiteaz gain hari gogor egiteko aurrera eraman beharreko estrategia sindikala bezalako gaiak aztertzen ditu.

Itsasoaz bestaldeko ipuinak
Antton Irusta
Ibaizabal
63 or. / 7,80 euro

Itsasoa zeharkatzen duten ipuinak

Enrique Morenteren marrazkiz apaindurik plazaratu den Antton Irustaren kontakizun hau zortzi urtetik aurrerako haurrei dago zuzendua. Protagonista, aita marinela duen neskato bat da. Epe luzeak pasa behar izaten ditu dagoeneko munduko itsasertze gehientsuenak ezagutuak dituen bere aita ikusi gabe, eta hura itzuli bitartean, bidaietako batetik ekarri zion atlasean ea non aurki daitekeen asmatzen eta aitak maiz bidalitako gutunetan kontatzen dizkion ipuinak irakurtzen ematen du denbora.

Elurretan hotsak
Pablo Sastre
Susa
174 orrialde 12,80 euro

Elurte egun batzuetako Andoaingo polifonia

Elur gutxi egiten duen lurraldean bizi gara euskaldun gehienok, eta inguruan dena zuri dagoela ikusten dugunean, zerbait berezia bezala bizi ohi dugu. Horrelako egoera batean kokatu ditu Pablo Sastrek bere azkenengo idazlanaren gertakizunak, sei ekitalditan banatutako nobela mintzatua den Elurretan hotsak liburuan. Elurte egun pare batean Andoain eta honen inguruetan dabiltzan herritarrei suertatzen zaiena kontatzen da bertan. Elurrarekin, badirudi ohizko bizimoduak nolabaiteko etendura izan beharko lukeela, baina ez da horrela, eta egunerokoari heldu beharko dio derrigor, bai lana duen herritarrak bai langabe aurkitzen denak, zoriontsu denak pozik, zoritxarrari aurre egin behar dionak goibel, eta presoak askatasuna amestuz. Eta kalean, lantegian, tabernan, dendan, errepidean edo kartzelan egingo dute batzuk besteekin topo herritar horiek, eta orduan kontura dakartzaten gaiak eta horiek adierazterakoan bakoitzak darabilen hizkerak osatzen dute Pablo Sastreren nobela honetako polifonia. Liburu guztiz mintzatua den hau, bere egituran antzerkiarekin zerikusirik asko duen poema bat ere bada. n


Azkenak
2024-03-31 | Julen Azpitarte
Zinearen historiako film-kontzerturik “onena”

Oscar sari andana jaso zuen The Silence of the Lambs (1991) thriller-a zuzendu zuen Jonathan Demme (1944-2017) zinegile estatubatuarrak estreinatu zuen zineak inoiz eman duen kontzerturik onena: 1970eko hamarkadaren erdialdean New Yorken eratutako Talking Heads taldearen Stop... [+]


"Enpresa pribatuen esku utzi da segurtasun publikoaren norabidea"

Ertzaintzaren azken hamarkadako bilakaera teknologikoa aztertu du bere liburu berrian Ahoztar Zelaieta ikerketa kazetari, kriminologo eta ARGIAko kolaboratzaileak. Segurtasunaren industria ikertu eta Ertzaintzarekin duen lotura plazaratu du, La Ertzaintza que viene... [+]


Campi Bisenzioko GKN fabrikan batu dituzte langile borroka eta ekologismoa

2021eko uztailaren 9an jaso zuten kanporatze abisua Campi Bisenzioko GKN lantegiko 422 langileek. Biharamunean berean abiatu zuten fabrikaren okupazioa eta orduz geroztik bertatik dabiltza borrokan, deslokalizazioaren aurkako borroka zena bestelako industria eredu baten aldeko... [+]


Judith Bilelo Biachó
"Erakundeek ez digute lagunduko, guk geure hizkuntzan hitz egitea lortzen ez badugu"

Judith Bilelo Biachó gure artean izan zen iragan udazkenean, Garabideren Aditu programaren karietara. Ekuatore Ginean jaioa (Malabo, Bioko, 1975), bubi etniako kide da, bubiera hiztun eta hizkuntzaren aldeko militantea. Iraganaz bezainbat mintzo da orainaz, geroari... [+]


Eguneraketa berriak daude