Uztailak 5, data larria "Gara"rentzat
Uztailaren 5erako Baigorri Argitaletxe SA eta KIE SAk 5,1 milioi euro ordaintzen ez badute, ondasun bahituraren bideari ekin diezaioke Gizarte Segurantzak. 'Gara'ren kudeatzaile eta langileek behin eta berriro azpimarratu dute juridikoki ezinezkoa dela Orain SAren oinordeko izatea, besteak beste, enpresa hori Baltasar Garzonen esku dagoelako azken bost urteetan. Arrazoi ideologikoetan oinarritutako eskaera honek juridikoki ez hanka ez bururik ez duela argudiatzen da iturri eta iritzi gune oso desberdinetatik, baina egungo Espainian aspaldi galdu da ikuspegi juridikotik bakarrik aritzeko ohitura, areago euskal gaiak mahaiaren gainean direnean.
Euskaltegi pribatuak eta Jaurlaritza
Joan den astean, euskaltegi pribatu homologatuen %85a ordezkatzen duen taldeak HABEk eta Eusko Jaurlaritzako Sailburuordetzak helduen euskalduntze-alfabetatze sektorea berrindartzeko eginiko proposamena kritikatu zuen. Proposamen hori aldatzen ez bada, hurrengo ikasturtea arrisku larrian dela adierazi zuten. Euskaltegi homologatuek datorren ikasturterako diru laguntza publikoak gutxienez %10 igo beharra ezinbesteko jotzen dute. Jaurlaritzarekin negoziatzeko borondatea agertu dute eta asmoa, hurrengo ikasturteari begira dena lotua edukitzea bazen ere, negoziazioak atzeratu beharrean izan dira, uda horretarako garairik onena ez dela ohartuta.
Rikardo Arregi saria
Eizagirre ahizpentzat
ARGIAra heldu da Rikardo Arregi kazetaritza sari nagusia. Izan ere, Estitxu Eizagirrek eta Ixiar Eizagirrek eskuratu dute saria ARGIAn 2002ko ekainetik 2003ko maiatzera egindako elkarrizketengatik. Epaimahaiaren arabera, ahizpen elkarrizketetan «ez da pertsonaiaren azaleko azterketa soila egiten, elkarrizketa ikuspuntu sakon batetik bideratzen dute eta pertsonaia bera aberasten dute». Elkarrizketen dokumentazio lana, lan grafikoa eta itzulpena ere nabarmendu zituen epaimahaiak. Amets Arzallusek hasberrientzako saria eskuratu du Euskadi Irratiko «Goizean Behin» irratsaioan egiten duen kolaborazioagatik. Bestalde, «Goienkaria»ko Leire Kortabarria kazetariak aipamen berezia jaso zuen. Ohorezko saria historian euskara hutsez argitaratutako hiru egunkarientzat izan da, «Eguna», «Euskaldunon Egunkaria» eta «Egunero»rentzat hain zuzen.
Euskal abizenen aldizkaria
Euskal abizenak izena duen aldizkaria aurkeztu dute Alejandro Arizkun, Mikel Belasko eta Fernando López Permisán nafarrek, Lizardi multimedia enpresaren eskutik. Helburua abizenen esanahia eta etimologiaren inguruko ikerketak hedatzea, haren aldaerak eta grafiak, izena eman zion sorlekua... aztertzea da. Aldizkaria
orrialdean eskura daiteke.
Tourra euskaradun
Euskal herrian euskaraz taldeko hiru kide, Tourreko zuzendari den Jean Mari Leblancekin mintzatu dira. Bilera horretan, Tourra Euskal Herritik igaroko den etapan, uztailaren 23an alegia, euskarak izan behar lukeen presentziaz hitz egin zuten. Leblancek harrera ona egin zien egindako proposamenei: ahoz hainbat konpromiso hartu zituen eta idatziz lehenbailehen bideratuko zituela agindu ere