Koldo Izagirrek honela zioen «Gara»n: « (Martin Ugalde) Bi hizkuntzatan idatzi duela pentsa genezake, baina bi idazle dira. Bere taldearekiko literatura beti hizkuntza bakarrean lotu du, sakonen zaizkion kodeak erabiliz... Bera bizi izan den taldeari beti talde horren hizkuntzan mintzatu zaio».
El Ballet de Daghestan taldeko ordezkariek honakoa aipatu zuten «El Diario Vasco»n: «Dantzan, egungo gizarteak dituen arauek baldintzatzen dituzte bikoteen arteko harremanak. Dantza azkarra eta animatua izan arren, mutil batek ezingo du neska gazte bat ukitu inoiz».
Itziar Zubizarreta ipuin kontalariak zera esan zuen «Gara»n: «Ipuinak kontatzen ditudanean, nolabaiteko lilura sortzen dela nabaritzen dut. Horrek bakarrik ez du irakurtzeko zaletasuna pizten, baina lagungarria izan daiteke».
Josu Camara, Kukubiltxoko kidea «Nabarra»n: «Gaur egun (...) askozaz zailagoa da ume bat ikuskizun batean aho zabalik edukitzea, zeren dauzkaten erreferentziak askozaz ere ikusgarriagoak izan baitaitezke».