Jaurlaritzak bere burua defendatu behar du. Zer gutxiago, ezta? Jaurlaritzak bere funtzionamendua defendatzea onargarria eta txalogarria da. Baina noraino joateko prest dagoen ez dakigu. Sorpresa litzateke Jaurlaritzak jarrera hori bururaino eramatea. EAJ iaioa da legea betetzen, desobedientzia ez da bere ikurra, nahiz eta euskal herritarron borondatearen kontra izan. Orain jokoan du bere sinesgarritasuna, baina Estatuak ere bai. Nik susmoa dut auzia ez ote den hauteskundeak burutuz amaituko, horrela SA eliminatuko lukete eleganteki eta fiskaltzaren arazoa hutsean geldituko litzateke.

Batasuna legez kanpo ezarrita, klandestinitatea eta gerra espero zuten. Ezker abertzalearen aldetik ordea, parte-hartze publikoa hobetsi da. Betiko ezker abertzalea bere buruaren jabe da, ez du proposamen politikoak egiteko gaitasuna galdu. Alde horretatik begiraturik, AuB eta antzeko ekimenak ezinbestekoak dira, baina eurak diren bezala, bere ezaugarri propioekin, eta ez kanpotik nahi duten modura. Abertzale eremua hainbat esferetan zatituta dago, eta betiko ezker abertzaleari -Batasunaren ildoan joan denari- ezin diogu eskatu besteen modukoak izatea.
Herria 2000 Eliza gatazkaren irtenbidea autodeterminazioaren eskubidea onartzea dela konbentzituta dago, sasi-irtenbideek ez dutela balio. Betiko ezker abertzaleak hori proposatzen du. Arazoa da nola egituratuko den eta ea kapaz den instituzioetatik kanpo lan egiteko. Urteak eman zituen hainbat instituzioetatik kanpo eta besteek eskatu zioten instituzioetara joatea. Orain, instituzio guztietan ari zenean erasorik latzena etorri da, bere karguak leku guztietatik erauziak izaki. Bere karguek erantzuteko gaitasuna erakutsi dute ordea, besteek espero ez zuten moduan. Batasuna debekatu ostean kristorenak eta bi gertatuko zirela uste zuten, aldiz, proiektu politikoa eta parte-hartze publikoa lantzea hobetsi da. Itxaropentsua naiz eta sektore honen parte-hartzea funtsezkoa ikusten dut.