127 orrialde
11,70 euro

Burlatan sortua da Anjel Erro, "Eta harkadian ni.(Epigramak eta Eglogak)" deritzan olerki bildumaren egilea. Joseba Jaka III. Literatura Bekako saria eskuratu zuen idazle gazte honek poesia klasiko erromatarra erreferentzia gisa darabilen proiektuarekin, eta hauxe da bakarka argitaratu duen bere lehenengo liburua. Bertan agertzen duen poetika zahar-berritzailea bezain ausarta, hauslea, gaiaren trataeran gazi-gozoa eta erabat jantzia dela esan dute kritikoek. Epigrametan, Horazio, Virgilio, Marzial eta beste hainbat islaturik daude, espreski edo akotazioen bidez, Anjel Erroren poemotan, eta haien moldetan-edo egindako poemak dira orain aurkezten dizkigunak. Denera, ehun eta bat epigrama eta literatura hizpide duten hiru egloga azaltzen ditu "Eta harkadian ni"n. Epigrametatik batzuetan satirarako joera agertzen du, nahiz satira horren azpian biziaren garratzari buruzko gogoeta ere egon badagoen. Eta besteetan nabaria da bere zorroztasuna, batik bat amodioa, angustia, edota beste giza sentimenduen inguruan idazten duenean. Klasiko unibertsaletatik zein guretik asko edan duen poeta dugu Anjel Erro.

428 orrialde
18,03 euro

Traineruen arteko norgehiagoka gai daukaten mila eta zazpirehun bat bertso bildu ditu Antonio Zavalak "Estropadak bertsotan" liburuan. R. M. Azkuek Hondarribian ikasi zituen bertso batzuekin hasten du bere bilduma, 1854an ondarrutarrak eta lekeitiarrak aurrez aurre izan zituen estropadari norbaitek jarri zizkion bertsoekin, Manuel Lasartek 2001ean "Arraunlari guztieri" jarritako bertsoekin zein Fabian Loidik idatzitako "Oriotarrak" bertso sortarekin amaiera emateko. Makina batek arraunari eta arraunlariei eskainitako bertsoen emaitza hau, 1941eko igande goiz batez jokatu berria zen estropadaren bertsoak saltzera Tolosako parrokiko atarira etorri zen bertso saltzaileari eskaintzen dio Antonio Zavala nekaezinak.

668 orrialde
14 euro

Eusko Ikaskuntzak plazaratzen duen "Mediatika. Cuadernos de Medios de Comunicación" aldizkariaren 8. zenbakian, zientzi kazetaritza mintzagai duten berrogeita bost lan bildu dituzte, guztiak adituek eginak. Zientziak komunikabide ezberdinetan (prentsa idatzian, irratian, telebistan, dokumentaletan zein Interneten) eta argazkigintza, infografia eta dokumentazioa bezalako alorretan jasotzen duen tratamendua aztertzen da bertan, besteak beste, ikuspuntu zeharo anitzetatik. Lan gehientsuenak gazteleraz dauden arren, badira euskaraz irakurri daitezkeenak ere, hala nola Pili Kaltzadak eta Alfontso Mujikak idatzitakoa, Inaki Irazabalbeitiak eginiko bi ekarpen eta Fernando Plazaolarena.

131 orrialde
9,10 euro

Pintore, eskultore, arkitekto, asmatzaile, anatomista, musikari, ingeniari, idazle...eta batek daki zer gehiago izatera iritsi zen Leonardo Da Vinci handiaren biografia idatzi du orain Fernando Morillok., jenioak bere baitan zeuzkan kontraesanetan zein Leonardo Da Vinciri bizitzea egokitu zitzaion Quattrocento garaian bere arreta jarriz. Izan ere, besteak beste, gizakiok hegan egitea posible genuela egiaztatu nahi izan zuen gizona perfekzionista peto-petoa omen zen berez, eta agian horregatik utzi zituen erdi-eginda bere lanetatik ugari. Bestalde, bakezalea izanik, historiako guda-ingeniari handienetakoa bilakatu zen Leonardo Da Vinci, makinak eta mekanismoak maite zituelako beharbada. Eta milaka orrialde idatzi zituen arren, ez zuen sekula liburu oso bat osatu.

91 orrialde
6,95 euro

Juan Luis Mugertzak idatzitako nobela honetan lehengo txirrindulari gogotsu haiei egiten zaie omena, bizikletan ibiltzeko noizbait eskura zezaketen garaipenaren ametsa baino ezer gehiago behar ez zutenei bere txirrinda zaharraren gainean harat honat nekagabe ibiltzeko. Horrelakoxea dugu "Astoari konfiturak" narrazioko protagonista, buruan "Gora Euskadi" dioen trapuzko txapela, soinean "Juanjo erretegia" letra handitan erakusten duen alkandora mahuka luzeduna, ez betaurreko eta ez ezer bere bizikleta zaharrean pozik dabilena. Baina bere herritarren kritikak bizikleta eta ekipo berri bat erostera bultzatuko dute gizona. Eta Bilbon, erosketaren inguruan bizi izanikoak eta geroztikako gorabeherek estualdi ederretan ipiniko dute gure txirrindularia.

98 orrialde

"Bizitzen lagundu" darama lematzat Gipuzkoako Foru Aldundiaren Gizartekintzak eta Euskal Herriko Unibertsitateak euskaraz eta gazteleraz prestatu duten "Gizarte babesik gabeko haur eta gazteak zaintzeko plana"ren berrargitalpenak. Autonomi zein lurralde mailako arautegiek jasotako lege oinarriei jarraituz osatu dute, eta ahalegina eginez nazioarte mailako komunitate zientifiko eta profesionalak definitutako gutxieneko estandarretara egokitzeko eta beroriek betetzeko, bai haurrak babesik gabeko egoeran egon ez daitezen prebentzio mailan egin behar den lanari dagokionean, eta bai egoera horiek gertatu direnean parte hartzeko moduari dagokionez.

130 orrialde / 5 euro

Sua argitaletxeak kaleratzen duen "Euskal Herria" aldizkariaren azken zenbakiak euskal kostaldeari eskaini dio tarte nagusia, orban beltzez estali nahi izan duten arren, mendeetan zehar kresalez busti den paisaia liluragarri hau oraindik eskura dagoela gogoratzeko. Bertan aurki daitezke ere garai batean Kantauri itsasoko uretan hain gustura ibiltzen ziren euskal baleei buruzko erreportaia, Aizkorrira eginiko ibilaldia, gauez lan egiten dutenen giroa, Lastur haraneko zezenak eta beste gai interesgarri asko.