Euskal-espainiar komunikabide enpresen talde berria, hau da, Correo Prensa Española taldea, Grupo Correok, besteak beste, "Correo Español" eta "Diario Vasco" egunkarien argitaratzaileak, Prensa Española ("ABC") bereganatuta sortu da, eta horrelaxe hasi da funtzionatzen aurtengo 2002ko urtarrilaren 1etik aurrera. Hala, komunikabideen inperioa bihurtu da talde berria, eta orobat dirua eta espainiar aberria egiteko makina bihurtu da (Espainiaren batasuna da taldearen hastapen ideologiko edo editorialetako bat), talde honen asmoak ez baitira eteten "ABC" espainiar taldearen absortzioan. Urrutirago doaz, eta ARGIAk eskuratu dituen datuen arabera, Kataluniako prentsa eta Galiziakoa dira hurrena lortu beharreko helburuak. Hori, Hego Amerikan duen presentzia baztertu gabe, hain zuzen ere Argentinan baitago, eta bertako krisiak izan dezake eraginik eremu horretan duen planen atzerapenean. Era berean, egungo ekonomia krisiaren bilakaeraren baitan dago burtsara ateratzea ere, nahiz eta datu guztien arabera urte honen beraren bukaera aldera bere kapitalaren parte bat burtsara aterako den.

Egin berri dituen eta egingo dituen urratsei esker, Espainiako Estatu osoko bigarren komunikazio taldea bihurtu da dagoeneko enpresa talde berria. Prisa taldea da aurretik duen bakarra: talde horren fakturazioa 2000. urtean 1.200 milioi euro ingurukoa izan zen, eta irabaziak berriz 100 milioi euro ingurukoak izan zituen. Correo-ABC taldeen bateratzetik sorturiko taldearen fakturazio erantsia 2000. urtean ia 600 milioi eurokoa izan zen eta irabaziak, berriz, 100 milioi euro ingurukoak. Beheko koadroko zenbakietan ikus daitekeenez, hortik oso urrun geratzen dira beste komunikabide taldeak: Zeta taldea adibidez, "Periódico de Cataluña"rekin besteak beste; Unidad Editorial taldea, "El Mundo" egunkariarekin besteren artean; Recoletos taldea, besteak beste "Marca" kirol egunkariarekin; Godo taldea, "La Vanguardia" egunkariarekin besteak beste; Prensa Iberica taldea, besteren artean "El Faro de Vigo"rekin, eta Voz taldea, "La Voz de Galicia" egunkariarekin besteak beste.
Ez da kasualitatez gertatu Grupo Correok orain arte Zamudioko Torrelarragoitiko industrialdean zuen gizarte eta zerga egoitza, Prensa Española taldearekin bat egin ondoren, Madrilera aldatu izana, Juan Ignacio Luca de Tena kaleko 7. zenbakira. Baldin eta Grupo Correok bereganatu badu Prensa Española eta horren ondorioz sorturiko elkartea kontrolatzen badu, gauzarik zentzuzkoena gizarte eta zerga egoitzak Bizkaian jarraitzea dirudi, era horretara Bizkaiaren onurarako izango bailitzateke zergen ordainketa. Ez da adibide ona beren euskal egoitza utz dezaten presionatuak gertatzen ari diren beste euskal enpresa batzuentzat. Izango du horrek zerikusirik noski espainiar aberria egitearekin!


Grupo Correok, hau da, Ybarra eta Bergarechetarrek, kontrolatzen du Correo Prensa Española taldea; izan ere, Correoko euskal taldeko akziodunek inperio berriko akzioen %79ren jabe dira, eta ABCko espainiar taldeak berriz akzioen %21 du bere esku. Grupo Correoren estrategia izan da hori guztia. Izan ere, duela ehun urte ia "Correo Español" eta "Diario Vasco" bezalako bi egunkari lokal kudeatzen dituelarik, beste egunkari lokal eta eskualdekoak bereganatuz joan da, eta irratian ere sartu da (Cope), baita telebistan (Telecinco), eta beste ikus-entzunezko komunikabideetan (telebista lokalak) eta elektronikoetan (Internet) ere. "ABC" bereganatuta eta harekin bat eginda, estatu osoan argitaratzen den egunkari baten gestiora eraman du, garai batean "Ya" madrildar egunkariarekin lortu nahi izan zuen gauza, baina operazio hark huts egin zuen. Oraingo operazio honen ondoren, Correo Prensa Española taldeak 3,4 milioi irakurle eskuratu ditu prentsa idatzian.
Komunikabide talde berri honek oraindik gehiago nahi du ordea. Zabalkundearen bila jarraitzen du eskualdeko prentsan eta prentsa "nazionalean". Hala, iritsi zaizkigun argibideen arabera, Zeta taldeko komunikabideak bazterturik, Katalunian dabil orain Ybarra eta Bergarechetarren taldea, "La Vanguardia" egunkariaren atzetik. Esaten dutenez, Godo familiaren katalan egunkari hau barne krisi latza ari omen da pairatzen, irakurle arazoak direla-eta alde batetik eta bestetik berrikuntzarako ahalmen falta dutelako eta, eta agian Godotarren familiak berak barne arazoak dituelako. "La Vanguardia"k gaur egun bizi duen egoera "ABC"k Grupo Correorekin elkartu aurretik bizi zuenarekin alderatzen dute batzuek.
Galizia Correo Prensa Española taldearen beste helburu hurbil bat dela dirudi. Hala, arreta handiz aztertzen ari dira Bergarechetarrak Voz galiziar komunikabide taldearen bilakaera… azken garaiotan, desiratzen zen emaitza izan ez duten urrats batzuk egin dituztelarik gainera. "Diario 16" erostea eta Voz irrati katea sortzea ez dira operazio onuragarriak izan, alderantziz baizik, eta Reitarren familiak, Voz taldearen jabeak, izan dezake interesik enpresa osoa edo parte bat gainetik kentzeko. "La Voz de Galicia", galiziar talde honen egunkari oso errentagarria, da Bergarechetarren taldeari gehien interesatzen bide zaiena.
Eta gauza gehiago. Euskal-espainiar komunikabideetako enpresa inperio berri honek Hego Amerikan zabaldu nahi du bere hiri eta eskualdeko prentsa eredua. Grupo Correo dagoeneko Cimecoren %33ren jabea da, eta talde horrena da Argentinan argitaratzen diren "La Voz del Interior" eta "Los Andes" egunkarien %85. Ulertzekoa denez, egunkari horiek Argentinan pairatzen ari diren krisi orokorraren mende daude. Cimecok egoera zail bati aurre egin beharko dio laster, pesoetan fakturatzen baitu eta zorrak dolarretan dauzka. Argentinak bizi duen krisi ekonomikoko egoeran, Grupo Correok eten egin ditu oraingoz herrialde horretako eta Hego Amerikako inbertsioak, Argentinako arduradunen erabaki politiko eta ekonomiko berrien zain. Hala eta guztiz ere, eta Argentinako egoera politikoa eta ekonomikoa argitzen ote den zain, Grupo Correoren erabaki estrategikoa da inbertitzen eta negozioak egiten jarraitzea Argentinan eta Hego Amerikako beste lekuetan.


Correo Prensa Española taldea komunikabideetako bigarren talde indartsuena bihurtu da Espainiako Estatuan. Talde berri honek martxan dauzka dagoeneko zazpi negozio unitate; Zuzendari nagusia Juan I. Mijangos da, eta baditu halaber lau alor korporatibo, Jose Manuel Vargas izanik alor horien zuzendari nagusia.
Hauek dira zazpi negozio unitateak eta arduradunak, hurrenez hurren: "ABC" (Santiago Alonso), Eskualdeko Komunikabideen Korporazioa (Angel Domenech), Ikus-Entzunezkoen Komunikabide Berrien Korporazioa (Victor Viguri), Komunikabide Digitalen Korporazioa (Jose Maria Martin Guirado), Teknologia Berrien Korporazioa (Imanol de Cristobal), Nazioarteko Komunikabideen Korporazioa (Fernando Samaniego), eta Komunikabideen Korporazioa (Luis Iparraguirre). Hauek dira lau eremu korporatiboak eta eremu bakoitzaren arduradunak: Ekonomia-Finantzak (Enrique Marzal), Edizio Koordinazioa eta Erakunde Harremanak (Javier Bardaji), Komertziala (Jose Luis Hazas), eta Zuzenbide Aholkularitza (Jose Manuel Vargas).

Negozio iturri nagusiak aipatuko ditugu jarraian. Prentsan eskualdeko egunkarien liderra da, 11 egunkarirekin eta eguneroko 3 milioi irakurlerekin, ABC kontuan hartu gabe, OJDren arabera. Era berean, "El Semanal" igandeko gehigarria argitaratzen du, OJDren arabera 4 milioi irakurle dituena. Telebistan, gutxienez Telecincoren %25 kontrolatzen du, 75 milioi euroko inbertsioa egin eta gero. 2000. urtean kate honek 154 milioi eurotik gora irabazi zituen. Kontuan izan behar da Telecinco kateak Correo Taldearen irabazien %40 baino gehiago erdiesten duela. Irratian talde honek Cope sarearen %4 dauka bere esku. Produkzio etxeei dagokienez, "Periodistas", edota "Medico de Familia" sailen egile den Arbol Taldeko %17 dauka, eta "Boca a Boca" zinemako produktoraren %30 dauka ("Al salir de clase", "El comisario" eta abarren arduradun), azken honengatik 18 milioi euro ordaindu eta gero