HIRIA
105 orrialde
11,72 euro

Zientzi fikzioa lantzeko asmo sendoa du Julen Garikanopeñak, eta genero horretan orain arte egin duenaren lekukotza dugu "Zura eta Harrak", Hiria argitaletxearen bidez plazaratu duen liburua. Bi nobela laburrez osaturik dago. "Bizimotzak" izenburua du lehenak, non agintean daudenen arabera gaizkile dena bergizarteratzeko era berezia asmatu duten: presondegi-hiltegi batera eraman, herio krudela ezarri eta, akabo behintzat harena! Pozik asko bizi dira agintariak horrela, jakina, aurkari nabarmenik ez baitute, ia gasturik egin beharrik gabe gainera. Okerrena, ordea, beren bergizarteratzeko metodoa atzeratu gizarajo bati ezartzen diotenean gertatuko zaie: heriotza eman, ondo lurperatu eta handik zenbait egunetara laguntza eske deiadarka hasten denean. Bizirik dagoela ematen du, baina kasu horretan, beraiena litzateke errua... lotsagarri gelditu ezean, nola garbitu berriro? "Apar naparra" da bigarren narrazioa. Horko gizartean, ahanzte terapia ezartzen zaio gauzarik nimiñoenean aginteak dioenarekin bat ez datorrenari, eta berehala ahazten ditu oroimen txar guztiak, alegia eztabaidan jartzen zituen haiexek... nahiz bera nor den ere gogoratzeko gai ez izan.

PAMIELA
168 orrialde
23,44 euro

Hamalau urte igaro dira jada, José María Sánchez Carrión "Txepetx" ikerlariak "Un futuro para nuestro pasado. Claves de la recuperación del Euskera y teoría social de las lenguas" kaleratu zuenetik. Eta auziak berdintsu dirau, Xamarren ustez: gehienak ez ikusiarena egiten jarraitzen dutelako, batzuek interesik ez dutelako (edo kontrako interesak), eta beste batzuek informazio faltagatik. Azken hauei begira osatu du Xamarrek Pamiela argitaletxearen eskutik kaleratu duen "Oreka. Herri eta Hizkuntzen ekologiaz" liburua, hizkuntza guztien gordailu -eta erantzule- den gizadia oreka bizigarrian garatu eta irauteko baldintzaz mintzo dena, hizkuntzaren biziarekin eta bizitzaren hizkuntzarekin zerikusia duten oinarri, gako, iritzi, joera eta gainerako guztiak bilduz, eta era erraz, erakargarri eta atseginean eskainiz.

61 orrialde
5,41 euro

Xabier Mendiguren Bereziartuk euskaratu ditu "Halaxe dira gauzak!" liburuan bildurik agertzen diren Garbiñe Salaberriaren bost narrazioak: "Horixe bezain erraza", "Maitasuna kartara", "Hurbiltzen ari diren orduak", "Bere begiradatik salbo" eta "Jadanik gau itsua". Guztiak hamabost urte inguruko neska eta mutilak dauzkate protagonista, beren gogo sutsu, ezinegon eta beldurrekin. Eta egoera berezi horrek, ordura arte sekula egin izan ez dituztenak egitera bultzatuko ditu. Batek, eskuko zati bat galduko du gogoz, auzoko jaunxkilak gaina har ez diezaion. Bestea, elkarrekin irtetera lotu nahi duen mutilaren amarruan eroriko da, oharkabean. Ohean pixak alde egiten dion neska gaixoaren kasu gogorra dago gero. Eta maitasunaren lilurak edota hormonen gorakadak eraginda egin daitezkeenak eginda sufritzen dena.

111 orrialde
9,02 euro

Gorka Salmeron Murgiondoren azken argazki bilduma da "Natura", Ongarri argitaletxeak egungo euskal argazkilaritzari eskaintzen dion "Serie blanca" sailean plazaratu duen lana. Zuri-beltzean eta kamera mota ezberdinak erabiliaz aritu da Legazpin jaiotako argazkilari gazte hau "Natura"n agertzen diren irudiak jasotzerakoan. Eta Edorta Kortadik liburuaren hitzaurrean dioenaren arabera, berriz ere Legazpi inguruko paisaiaz maitemindu zaigu lan hau egiterakoan, pago eta haritzez, mendi hegal txiki eta bertako belazeez, elurretako giza oinatzez eta urruneko mendiez maitemindu; eta espazioaren sinplifikazio eta poetizazioak, bere arreta mikro eta makroklima jasotzera eraman du, detaile txikienak ere zainduta dituen paisaietan erreparatzera, bere fotografia preziosista eta sendoagoa bihurtuz.

34 orrialde
4,15 euro

Dimitri kapitaina eta bere lagun pirata ausartak, Karramarro uhartera bueltan datozen batean, itsaso izugarri zakar bati aurre egin beharrean izaten dira. Mendi baten neurriko olatuak altxatzen dira haien inguruan, Kain itsasontzia eta bertako guztiak arrisku larrian jarriz. Halako batean, urjauzi erraldoi batek hondoratzen ditu eta, nola ez dakitela, uharte zoragarri eta ezezagun batean esnatzen dira. Uharte horrek, tontor bat du, eta tontorrean jauregi eder bat ageri da. Harantz abiatzen dira piratak. Jauregiaren ate aurrean, emakume dotore bat daukate zain. Harrera ezin hobea egiten die eta bere laguntza osoa lortzen dute. Baina behin itsasontzia konpondu eta Karramarro uhartera itzultzeko prest direnean, bere uhartean gelditzeko eskatzen die andere horrek. Eta ezetz esaten diotenean, sorgin itsusi batean eraldatzen da.

277 orrialde
13,82 euro

Gaiak argitaletxeak, bere Historia eta Gizartea sailean, plazaratu du Murgil Taldeak osaturiko "Elikatzetik gastronomiara. (Nola elikatzen ginen, nola elikatzen garen)" idazlana. Egileen asmoa, gaur egun, "ohituren macdonalizazioa" dela-eta, mendetan zehar garatutako gastronomi kultura arrisku bizian dagoenean, jateak beti izan duen eginkizun soziala aldarrikatzea da. Alegia, jatea ez dela elikatzea bakarrik, gizarte-ekintza garrantzitsu bat ere badela agerian uztea. Horretarako, atzera egiten dute, besteak beste aztertuz elikadura eta gizarte klaseak Errenazimentuan, espeziarien garrantzia, Ameriketatik Europara konkistatzaileek ekarri zituzten patata, tomatea, artoa, kakaoa eta abar elikagai berriek elikadura moldeetan eragin zuten iraultza, edari kolonialak eta azukrearen gorakada, produktu tropikalak...

215 orrialde
15,63 euro

Askabidek, Oreretan bere egoitza duen Sexu Osasun Klinikak, kaleratu du "Erosen txokoa. Deseos, ardores, pasiones, amores y placeres" deritzan Luis Elberdinen liburu hau, non jasorik dauden sexuaren inguruan aditu honek "Gara" egunkarian argitaratu dituen artikulu guztiak. Gai asko dira aztertuak, eta ezin denak hemen aipatu, baina ziur egon bedi irakurlea "Erosen txokoan" aurkituko dituela sexuaz izan ditzakeen aurreiritzi gehientsuenak bazterrera uzteko arrazoiak, Luis Elberdinek berdin heltzen baitio bakarkako sexu plazerrari, koitorik gabe besteren bati eman diezaiokegun sexu gozamenari, zein beste horrekin batera eduki dezakegun sexu harremana atsegingarri izateko moduei. Sexu kontuetan garrantzitsuena, norberaren gorputza ezagutu, ondo pasa, segurtasunez jokatu eta plazerra lortu eta ematea delako.