Gizakiaren bihotza miokardioak osatzen du ia osorik, 300 gramo pisatzen dituen muskuluak. Bihotzeko barrualdean lau kamara edo hutsune-moduko bereizten dira: bi aurikula eta bi bentrikulu. Horrela, gorputzeko atal desberdinetatik atzera bueltan datorren odola eskuineko aurikulatik sartzen da bihotzera, eta hortik eskuineko bentrikulura pasatzen da, hemendik biriketara joateko. Behin oxigenatu ondoren, odol garbia birika-benetan zehar ezkerreko aurikulara iristen da, eta hemendik ezkerreko bentrikulura. Kamara honetatik, eta aortan barrena, odola gorputz osora bidaltzen du miokardioak.

Miokardioaren uzkurdura bakoitzarekin 70 mililitro odol mobilizatzen dira, baina egunean zehar 7.000 litro dira zirkulatzen dutenak, 10.000 taupada erritmikoren bitartez. Bihotzeko taupada horiek bi hots edo soinu egiten dituzte: aurreneko hotsa aurikulen eta bentrikuluen arteko balbulak ixteari dagokio, eta bigarrena, berriz, bentrikuluen eta arterien arteko balbulen itxiera-danbatekoak eragina izaten da.
Eta itxura guztien arabera, Ameriketako Estatu Batuetako Kalifornian bada mediku bat bere pazienteei bihotzeko taupadak kontrolatzen erakusten diena, ordenagailu baten pantailan bihotz-erritmoak nola eboluzionatzen duen ikusiz eta hori ariketa mental sinple baten bidez kontrolatuz. Praktikaren eta entrenamenduaren ondorioz, bihotzeko punpa horren gainean erabateko kontrola lortzera iritsi omen da Rollin McCray izeneko ikertzailea, biofeedback izeneko teknikaren bitartez. Esan beharra dago yogak eta meditazioak ere laguntzen dutela horretan