63 orrialde
890 pezeta
36 libera

Sei urtetik aurrera daukan irakurlea izan dute gogoan Agurtzane Barrutiak narrazioa idazterakoan, Jose Belmontek idazlan hori irudikatzen duten marrazkiak egiterakoan, eta Elkarlanean argitaletxeak «Zure berrien zain» plazaratzerakoan. Elixabete eta Martin neska-mutikoak dira ipuineko protagonistak. Oso adiskide onak dira biak, baina Martinek beste herri batera joan behar izan du bizitzera eta, beraz, akabo elkarrekin eskolan eta kalean igarotako ordu luzeak. Hala ere, egoeraren goibelak sortutako tristura alde batera utzi, eta bilatu dute nola jarraitu beren adiskidetasuna: eskutitz bidezko harremana izango dute, gertatzen zaien guztia batak besteari kontatuz. Horrela du Elixabetek Beñaten berri. Martinek eskola berrian egin duen lagunik minenetakoa da Beñat, Down sindromea duen mutiko alai eta jatorra.

293 orrialde
2.000 pezeta
80 libera.

Begoña Bilbaok euskaratu du 1922an Paul Henri Capdeviellek frantsesez argitaratu zuen «Bermeo la sauvage» eleberria. 1912ko abuztuaren 12an euskal kostaldea gogor astindu eta Bermeon 116 arrantzale ito zituen galernari buruzko eleberria da Paul Henri Capdeviellerena. Baina ekaitz izugarri hark eragin zituen hondamenak agertzeaz gain, sasoi hartan euskal kostaldeko herri batean ematen zen eguneroko bizimodua bere nobelan azaltzen ere saiatu zen egilea, hau da, amodia, klaseen arteko ezberdintasunak eta itsasoari lotuta bizi den jendearen pentsamolde berezia agertzen. «Bermeo la sauvage»z gain, «Fils de la Terre» (1908), «François eta Guadalupé. Une roman pyrrénéen» (1913) eta Baionako «Gure Herria» aldizkarian kaleratu zen «La Croix Rouge» ipuina ere idatzi zituen Paul Henri Capdeviellek.

157 orrialde
1.900 pezeta
76 libera

Iñaki Gonzalez Garai, Eduardo Arrayet eta Antxon Gaztañaga dira mintegikide Gaiak argitaletxeak plazaratu duen «Ametsak eta garuna» liburuan. Historiaren hasieratik arduratu da gizakia ametsen jatorriaz eta esanahiaz, eta ordutik hasita aztertzen dute egileek garai eta kultura desberdinetan lo egitea eta amets egitea zer izan den. Antzinako Grezia, amets egitea mendebaleko Erdi Aroan zein Ekialdeko kulturetan, Ipar Amerikako herriek zer zioten honi buruz, Sigmund Freud eta psikoanalisiak eginiko ametsen interpretazioa, Carl Gustav Jungek Freudekin gai honen inguruan zituen desadostasunak, inkontziente kolektiboaren garrantzia, lotan ari garenean zer gertatzen den, garuna edo ametsak sortzen diren lekuaren funtzionamendua eta eboluzioa, amets premia eta ametsen baliagarritasuna, loaldiko arazoak...

112 orrialde
1.400 pezeta
56 libera

Alessandro Baricco italiarrak 1996an Milanon plazaratu zuen «Seta» nobela da Koldo Bigurik «Zeta» izenburuarekin euskaratu eta Igela argitaletxeak eskaintzen diguna. XIX. mendearen erdialdean zetaren merkataritzan buru-belarri sarturiko frantziar baten bizitzaren inguruko xehetasunak agertzen dira bertan: nola hasi zen zetaren ekoizpen eta salerosketa egiten; bere herriko zeta ekoizpena gehitzeko beharrezkoak zituzten zeta haren arrautzak lortzeko egin behar izan zituenak, munduaren beste aldean irudikatzen zuen Japonia urrun eta ezezagunera joatea barne; han hartutako ezagutzekin erabili behar izan zuen trikimailua; zeta bezain leuna izaten zekien emakume misteriotsu batekin bizitzea egokitu zitzaion sexu harreman berezia, eta gertaera horrek bere ezkon harremanetan izango zuen eragina...

140 orrialde
2.000 pezeta
80 libera

Jose Antonio Gorriti Goldaratzenak txikitatik ezagutu zuen Nafarroako baselizarik zaharrena, bertako meza-laguntzaile izan baitzen. Liburu honetan, baseliza horren inguruko ibilbide historiko eta artistikoa egiten du, hamabi eguzki-lore eta hiru eguzki-loretxoren bidez Aralarko kultura megalitikoa, San Migel goiangeruaren irudia, esmaltezko erretaula, VIII. mende inguruan eraikitako baselizaren berezitasunak, XII. mendean sortutako San Migelen Anaidia, Goñiko Teodosio zaldunaren elezaharra, San Migelgo elizañoko kobazuloa eta kredoa, Goñiko Teodosio zaldunaren kateak, San Migelen irudiaren urteroko ibilbidea, Aralarko ostatu zaharra (1717-1942), ostatu berria eta elizaren konponketa (1972), elizaren azken berriztatzea (1997-1998), Manuel Lekuonari eginiko omena, poemak eta beste xehetasunak azalduz.

270 ORRIALDE

Urte dezente joan dira Altzako Historia Mintegiak 1988an lehenengo «Altza, Hautsa kenduz» kaleratu zuenetik seigarren lan bilduma hau plazaratu duen arte. Nolanahi ere, guztietan, garai batean Gipuzkoako herri eta gaur egun Donostiako auzo den Altza horren bizimodu, historia, kultura, oroimen, eta pasadizoak islatzen dituzten idazlanak eta iragan hori bizi izan zutenen argazki hunkigarriak jaso ohi ditu «Hautsak kenduz»ek. Azkenengoan, besteak beste, hauexek hartu dute parte: Juan Gonzalez Andres, Joan Mari Irigoien, Xanti Zapirain, Gazteluene Bertso Eskola, Manuel Zapirain, Antxon Agirre Sorondo, Josu Tellabide, Alaitz San Roman, Angel Calvo, Iñigo Landa Ijurko, Juan Carlos Lizarazu, Arantxa Benito, Joxerra, Imanol Inziarte, Larraitz Garmendia, Javier Lorenzo, Segundo Garin eta Pelegrin Gonzalezek.

79 orrialde
1.500 pezeta
60 libera

Poesiak ia beti bizitzako kontu larrien inguruan diharduela zioen Jose Luis Otamendik, Susa argitaletxeak kaleratutako Jon Benito olerkari gaztearen «Aingurak erreketan» poema bildumaren aurkezpenean. Eta hitzen bidez norberaren zein gertuko dituenen minen eta itxaropenen ispilu izan nahia kontu larria bada, horixe baino ez du Jon Benitok egiten errekan behera joango ez diren eta errekak jango dituen aingura hauekin, bost ataletan banatutako poema liburuan: konpromisorako eskaintza eta bidaiarako proposamenarekin hasiz, osatze ariketa egin eta non gauden eta nolakoak garen aztertu, munduaren zabala eta zu neurtu, distantzia eta denboraren balizko esanahiaz aritu, non amaitzen diren ametsak eta norekin konpartitzen ditugun erabakiz izan ditzakegun lo aurreko zalantzak planteatu, jakinik mila zati egin garela mina pieza bakar bat egiteraino; eta hori guztia gogoratuz azken gudarostea, gerrako partea, larrialdi mezua eta iheserako arrazoiak, hala nola poetaren ideal zaharrak edota etengabeko guduan murgildurik dagoenaren nekea eta berriz ekin diezaiola pentsatzearen ilusioa, bere burari galdetuz aurrekoekin dugun zorra nola kitatu...