J. Muguruza
EREIN
60 orrialde
950 pzta./38 lib.

Jabier Muguruza, musikari bezala ezaguna izateaz gainera, haur zein helduentzako idazlea ere badugu. Besteak beste, "Sei lagun, sei sekretu" eta "Gabon guanito" plazaratuak ditu jadanik Erein argitaletxeak duen "Igela" sailean, eta hain zuzen ere argitaletxe beraren eskutik kaleratu du orain "Sebas leihotik begira", Jon Zabaletak marraztutako ipuin hau. Berebiziko garrantzia ematen die Jabier Muguruzak sentimenduei, eta jakina, sentimenduez mintzo da bere lan guzietan ere. Adibidez, bederatzi urtetik aurrerako irakurleengan pentsatuz idatzi duen "Sebas leihotik begira" ipuinean, haurrek gure gizartean jasaten duten bakardadea du hizpide. Oso bakarrik bizi da Sebas, mutiko protagonista. Izan ere, gurasoek etxetik kanpo ematen dituzte ordu gehienak, eta hiri handi batean bizi direnez, kalera irteten ere ez diote uzten, kaleko arriskuen beldur direlako. Horrela bada, etxe barruan, neskamearekin aspertuta pasatzen ditu egunak mutikoak. Telebista atsegin du, baina hura ikusteko ere eragozpenak dituenez, leihotik begira egon ohi da, eta handik ikus dezakeena marrazten du. Eta halere, bere bizigogoak irudimenezko abenturetan murgiltzen du.

Jean-Louis Davant
SOÜTAKO HERRIA
206 orrialde
1.750 pezeta
70 libera

Sohütako herritarrek antzeztuko dute aurten "Xiberoko makia", Jean-Louis Davantek idatzitako tragedia. Hirurogeita hamar sohütarrek hartuko dute parte antzezlanean, nazien zapalketari zuberotarrek nola erantzun zioten 2001eko ikusleei agertzen. Bi maki talde sortu ziren Zuberoan: Corps-Franc Pommiès deitua eta Armée Sekréte delakoa, izen militarra bazuen ere zibilez osatua izan zena. Eta bien berri emango du pastoralak, nahiz eta Jean-Louis Davantek aldez aurretik ohartarazten digun aipatu tragedia hau, pastoraletan ohizkoa denari jarraituz, sinbolikoa dela eta bi alderdi baino ez dituela erakutsiko: alegia onak eta gaiztoak. Halaber, espreski ahazten omen ditu Erresistentzian indar guztiek ez zutela jokabide bera izan, berarentzat garrantzitsuena zera baita, den-denek libertatea bilatzen zutela.

Karlos Linazasoro
ANAYA / HARITZA
76 orrialde
925 pezeta
37 libera

Bizi al liteke inor ametsik egin gabe? Horixe da Karlos Linazasorok "Bota gorriak" izenburua duen ipuina idazterakoan mahaigaineratzen duen galdera. Egilea ezezkoan dago, eta horregatik asmatu du kolore gorriko botak jazten dituen mutiko bat protagonistatzat daukan ipuin hau. "Imajina ditzakezu bota batzuk amets egiten eta gauza zoragarriak bizitzen lagunduko dizutenak?", galdera ere badago liburuan, bota horiek gainean daramatzan bakoitzean zer edo zer miresgarria gertatzen baitzaio ipuineko mutikoari. Baina honek ez die gurasoei gertatutakoaren berri ematen, nahiz gogorik falta ez, galdezka eta errietan hasiko zitzaizkiolako. Haatik prest dago sekretu horiek agertzeko ipuina irakurtzen duen edonori. Hamar urtetik aurrerako irakurlea izan du Karlos Linazasorok buruan "Bota gorriak" idazterakoan.

Paco Capdevila
AIZKORRI
22 orrialde
395 pezeta
15 libera

Kontu pittin batez, munduko lekurik seguruena izan daiteke gure etxea bertan bizi garen haur, heldu eta besteontzat, baina horretarako Paco Capdevilak Aizkorri argitaletxearen "Jone, Jon eta Txintxon" sailean plazaratu duen "Kontuz, kontuz!" ipuinean azaltzen dituen arriskuak kontuan eduki behar. Batik bat etxeko txikienek jasan ditzaketen ezbeharrak agertzen ditu Paco Capdevilak. Izan ere, gure txiki maiteek hamaika gauza egin dezakete inor ohartu gabe: atzamartxoa entxufean sartu, garbiketak egiteko erabiltzen diren era guztietako produktuak zein sendagaiak irentsi, sukaldeko lapiko eta zartaginak dantzan jarri, gasa ireki, poxpoloak "josalean" ibiltzeko hartu, berogailura arrimatu, goraizak eta labanak bereganatu, leihoetara edo balkoietara igo... Zer ez zaie haiei bururatuko, guk kontu pittin bat eduki ezean!

Simone de Beauvoir
IBAIZABAL
324 orrialde
1.830 pezeta
73 libera

Oier Alonso Etxeberriak euskaratu du Simone de Beauvoir-ek 1944an, armistizioaren hurrengo egunean, argitara eman zuen nobela existentzialista sakona den "Besteen odola". Beharbada gaur egun ez da "Gonbidatuak" edo "Mandarinak" bezain ezaguna izango, baina bere garaian oso ospetsua izan zen nazien okupazioari buruzko nobela hau. "Besteen odola" eskema ideologikoetatik harantzago doa eta idazle frantziarraren dohain eta ezaugarri nagusiak ditu: askatasunaren aldeko maitasuna, giza harremanen konplexutasuna eta emakumearen egoeraren salaketa jorratzen baititu Beauvoir-ek bertan, beste funtsezko gai batzuen artean. Jean ez da burgesa izanik ondo sentitzen eta langile bihurtu nahi du. Hélènek, berriz, maila apaleko gaztea izanda, bere bizitza aldatu nahi du zoriontsu izateko. Bitartean, Europa irakiten dago.

Batzuen artean
ORIOKO UDALA
145 orrialde
1.000 pezeta
40 libera

Ibai Esoain, Iñaki Iturain eta Xabier Sukiaren artean osatu dute lan hau, "Orio mende bat bertsotan", beste jende askoren elkarkidetza izan badute ere. Lau urte eman dituzte Orioko Udaleko Euskara batzordeak bultzatutako ekintza hau burutzen. Orioko bertsolaritza aztertzea zuen helburu, eta horixe egin dute Esoain, Iturain eta Sukiak, hau da, Aita Zabalak aurretik eginiko lana harturik oinarri eta abiapuntu gisa, gainerakoak erantsiz, joan den mendeko bertsolarietatik hasita gaur egun arte herri horretan sortu diren bertsolarien eta haien bertsoen gaineko gutxieneko azterketa eta azalpena eman. Lan eskerga izan da berea, zeren eta, Aiako bazterretan izandakoak ahaztu gabe, Igeldotik hasi eta Oriora bitarteko mendi zabal horren magalean bertsolari asko eta asko sortu baitira. Eta sortuko direnak, Orioko bertso eskolari esker!

Aitor Arana
IBAIZABAL
245 orrialde

A itor Arana dugu Ibaizabal argitaletxearen bidez plazaratu berri den "Amodioaren gazi-gozoak" idazlanaren egilea. Hamabi urtetik hamazazpira bitarteko gaztetxoei zuzendua dago eta XX. mendearen hasieran, Euskal Herrian bertan, lanerako saldu zuten neskato baten istorioa kontatzen du. Gorabehera handiko bizimodua izan zuen Mirenek, beti zerbitzari, beti lanean, urte luzeetan kartzela bilakatu zitzaion baserri hartan. Baina halere, maitasunez beteriko urte samurrak ere ezagutuko zituen gerora bertan. Horren guztiaren berri jakin ahal izango da hirurogei urte beranduago, beste neska gazte bat, bere gurasoekin aipatu baserri horretara oporrak pasatzera joan eta zer egin ez dakien egun batean bertako ganbara arakatuz dabilela, txoko batean Mirenek bere garaian idatzitako egunerokoa aurkitzen duenean.