Jaten ditugun haragiak gizentzeko erabiltzen den zakarra dela-eta oraintxe erotuko garelakoan nago. Oilaskoak, behikiak, txerriak eta abar hola-hala haziz gosez ez gara hilko, baina, diru-gosea ase ezin honetan janez hiltzen hasi gara.
Diru-gosearen fedea ez da, ordea, gutxi batzuen eliza. Haziendaren elikadurarekin gertatzen ari dena landareak hazten dituztenen artean ere jarduera zabaldua da oso. Pozoiak, ongarri kimikoak, intsektizidak, hormonak, heldu gabe dagoena ontzeko produktuak, herbizidak... bidezko bizibideak deuseztatzeko sortutako produktuak barra-barra erabiltzen dira ekoizpen gordinenera bideratutako soro gehienetan. Landareen hostoak edo fruituak ikusten ditugunean, elikagai naturalenak direla iruditzen zaigu, baina adi! Haragia ekoiztera emandako animaliek beste elikagaien ekoizpenetan dauden astakeriak ahal den azkarren aireratzen ahaleginduko dira, beraien amorrua eta agoniarako bidean jarri dituzten galera ekonomiko izugarriak ahal bezainbeste banatzeko. Laster honelako kontua besterik ez dugu izango ahoan. Honi aurre egiteko era bakarra kontsumitzaileona da: inguruan ekoizten diren garaian garaiko jakiak eskuratu beste aukerarik ez dago; eta ahaztu gabe... automobilak, etxeak, arropak eta abar bezala gizalegez ordaindu.