Egin dugu, aspaldiko partez Donostiako Reala futbol lehen taldean prestatzailea aldatzearekin. Eta aspaldiko partez diot zeren noiztik ez du Realak euskal komunikabideekin mintzatzeko gauza den entrenatzailerik? Irureta izan zen bere tontonean azkena, etxekoa izanik onenean kanpotik etorritakoek beren lehen denboraldiko hondarrean gaztelaniaz egiten duten eran euskaraz mintzatzeko gai zen Jabo hain zuzen. Eta Jaboren aurretik? Javier Exposito bere jardun laburrean. Izan ere, etxeko taldeak ez dira normalean euskararen eremu, nahiz eta Bai Euskarari esan. Orain, Osasunan Lotina bizkaitarra eta Realean Periko Alonso gipuzkoarra ditugu euskaraz entzungo gure euskal komunikabide urrietan itzulpenik gabe. Ez da gutxi. Bada zerbait. Ordea, garaipena lortu ostean euren adierazpenak euskaraz egin eta normalean euskal kazetariak egin behar izaten duten lan bikoitza erdaldunek noizbait proba dezaten nahiko nuke, nahiz eta badakidan hauek gauza ez direna. Baina polita litzateke balizko egoera horren aurrean beren buruak euskaltzaletzat dituzten erdal kazetarien jarrera ikus ahal izatea. Periko, Lotina, emaiozue aukera normaltasunari...