Deiadar berri bat botatzea deliberatu dute Ipar Euskal Herriko euskalgintzan diharduten elkarteek. 1989an Deiadar I izeneko lehen kanpaina eta manifestazio handia burutu zen, eta 1998an azkena; hots, Deiadar IV. Ekainaren 10ean, berriz, larunbatean, zenbakirik gabe, Deiadar 2000 burutuko da. Izan ere, Euskal Konfederazioan biltzen diren elkarteek Frantziako administrazioari euskararen etorkizuna ziurtatzeko exijitzen dizkioten baitezpadako oinarriak ez dira oraino finkatu. Hau da, benetako hizkuntz politika gauzatzeko diru laguntza ekarriko duen neurri politikoak ezartzea eta lege babesa arautzea.

Ez dago etorkizunari begira geratzerik. Honelatsu dio kanpaina eta manifestazioaren leloak: "Euskararen geroa orain trenkatzen baita". Izan ere, 1996an, Antolakuntza Eskemak hizkuntz plangintzarako oinarriak ezarri zituen arren, borondate politiko eskasez-edo, plangintza ez da oraino gauzatu. Anartean, euskaltzaleen ahalegina ez da inondik ere eskasa izan. Urterik urte, mobilizazio kanpainen karietara, herritarrek euskarari eskaini atxikimendua helarazi zaio Frantziako Estatuari. Kanpainaz kanpaina, 15.000 sinadura, 36 auzapezen atxikimendua edota euskalgintzan diharduten 100 elkarten eskakizunak helarazi zaizkio garaian garaiko gobernuari. Baita kanpaina bakoitzaren amaieran Baionako karriketan milaka lagunek jaurtiki dituzten deiadarrak helarazi ere.

Azken hilabeteotan, Eskema kudeatzen duten agintarien aldetiko honelako aginduak heldu dira: "Pazientzia pixkat bat, gauzak aitzina doaz-eta". Alabaina, Eurokarta ez da osoki sinatu eta Estatuaren eta Akitania erregioaren artean zazpi urtetan behin sinatzen den kontratuaren arabera euskararentzat aurreikusitako 26 milioi liberetatik (670 milioi pezeta) 17 baino ez ditu emanen Frantziako Gobernuak; kopuru hau okzitandarrekin banatu behar delarik. Ministerioarteko Lurralde Garapen eta Antolaketa Komitea (CIADT) da kudeaketa daraman batzordea. Joan den maiatzean harturiko deliberoen arabera urtea amaitu bitartean ez da deus berririk eginen. Hautetsi itxaronpetsuenek, alta, Lionel Jospinen gobernuaren kontratu berezi bat igurikatzen dute Ipar Euskal Herriarentzako.

Ipar Euskal Herriko euskararen atzerapena ez da oraingoz gelditu. Plangintza zehatzik ezean, mende honen erdialdean biztanleen % 5 baino ez da euskaraduna izanen. Euskaltzaleek ez dute fatalitatean erori nahi alta; ez daude zapuztuta inondik ere. Aitzitik, neurri eta baliabide egokiak ezarriz gero, bertako euskararen egoera irauli daitekeela uste dute. Frustazioari muzin egin eta jomuga garbiak dituzte euskaltzaleek. Hots, testuinguruaren araberako indar harremana sortzea eta emaitza konkretuak erdiestea. Antolakuntza Eskemak hizkuntz arlorako aurreikusia zuen dirua erdiestea, kasu. Horretarako, ahalik eta jende eta sektore gehienak inguratzea xede dutelarik.

Kanpaina bi mezu argirekin abiatu da: Estatuaren eta Akitaniaren arteko Plan Kontratuaren arabera etorri behar ziren 26 milioiak aldarrikatzea eta hautetsiei dagokien erantzukizunari dei egitea. Hautetsiei nahiz euskaltzaleei heldu den urteko herri hauteskundeen garrantziaz ohartarazi nahi zaie aldi berean, hegoaldeko euskaltzaleei ere dei egiten zaielarik. Euskal Konfederazioa betebehar honetan aritu da azken asteon. 80.000 trakta edo eskuorri zabaldu ditu dagoneko. Garapen Eskemaren plagintzaren arabera hainbat arlotan erabiltzen den diruaren berri eman du eta euskararentzat erabiltzen denarekin konparatu ditu. Bestalde, Frantziako Asanblea Nazionaleko diputatuei, Akitania Erregiokoei nahiz Departamendukoei eskutitz bana igorri zaie. Herrien Arteko Sindikatuko Jean Grenet presidenteari (Baionako auzapeza), Auzapezen Biltzarreko Daniel Poulou presidenteari (Urruñako auzapeza) eta Hautetsien Kontseiluko Jean-Jacques Laserre presidenteari (Bidaxuneko auzapeza) hitzordu bana eskatu izan diete Euskal Konfederazioko arduradun nagusiek.
Euskal Konfederazioan biltzen diren elkarteek ez dute Parisko agintarien aldetik inolako oparirik igurikatzen. Ipar Euskal Herriko hautetsiengandik erreakzio bat jaso nahiko lukete, ordea. Beren esanetan, hautetsiek konprenitu behar dute behin betikoz, beren esku dagoela erabakiak hartzea. Erran nahi baita, Euskara Euskal Herriko jendeak eta bertako hautetsiek salbatuko dutela.
Herritarrek, beste behin ere, Euskal Konfederazioaren eskutik Deiadar 2.000 delakoaren eskakizunak sustengatzeko trakta sina dezakete manifestazio egunean berean. Arratsaldeko 17:00etan hasi eta Santa Andres plazan erromeria giroan bukatuko da manifestazioa