Okina lanbidez, musikaria denbora librean, sentimendu aske eta zintzoen mezulari gainerakoan. Horrelakoxea da hitz gutxitan esanda Francis Diez, Doctor Deseo taldeko liderra. Astelehen, asteazken eta ostiraletan irin artean ematen du denbora, baina oraingo honetan labetik ez du ogirik atera, disko berria baizik, boskotearen seigarrena, "Atrapado en tu silencio... de incertidumbres y caricias" izenburukoa.
Neurri batean probokatzailea ere bada, eta zentzu zabalean gizarte inposaketen arerio. Doctor Deseo baliatuz, hots, musikari beteranoez (Joxi Jimenez, baxua; Txanpi, bateria; Kike, gitarra nagusia; eta Raul Lomas, teklatuak) osaturiko taldea baliatuz, azaleratzen du Francis Diezek barruan duen guztia, sentimenduen unibertso gazi-gozoak zintzotasunez deskribatzeko iaioa baita. Esate baterako, taldearen azken diskoak atsekabea islatzen du, Francis Diezen esanetan. Baina horrez gain, soinu aldetik berrikuntza ugari dakar (techno, drum & bass, eta hip-hop oinarriak sartu dituzte) aldi berean latza eta samurra den lan berri honek.
Hortaz, zuzeneko aurkezpenak egiteko garaia egokitu zaie Doctor Deseoko musikariei eta publikoari Francis Diez, liga gorria jantzita, eszenatokian ikusteko parada. "Lehen asteburuetan eramaten nuen liga kaletik, duela 12 bat urte oparitu zidatenean. Orain, ez dut kaletik eramaten, baina bai kontzertuetan, parafernalia moduan, gerra-margoa bezalakoxea baita niretzat. Badut transformista puntu bat, eta horren gainean, nire pertsonalitate eta nire homosexualitatearen gainean, ikertu beharko nuke noizbait, ia nirekin zer gertatzen den jakiteko".