Piarre Bordazaharre «Etxahun-Iruri» izengoitiarekin ezaguna izan zen, Barkoxen mende t'erdi lehenago bizi izan zen Piarres Topet «Etxahun» zaharragandik bereizteko. Hark bezala, hainbat kanta utzi digu, baina gainera pastoralak ere idatzi zituen, herriz herri jo zuen txirula (urte luzez, duela gutxi zendu den Piarre Agerre «Gat» atabalariarekin). Eta bertsolari ere ibili zen, «koblakari»: geroztik horretan ez a zuberotarrik ezagutu gehiago. Euskaltzain urgazlea ere.
Leku berezi bat dauka Etxahun-Irurik pastoralgileen artean. Bibliako eta Frantziako historia zaharretatik euskal historiako gaietarako jauzia egin zuen, pastoral laburragoak eginez, eta «Txikito Kanbo»rekin bezala, gure menderaino hurbilduz.
Pastoral hauek idatzi zituen: Etxahun (1953), Matalaz (1955), Berterretx (1958), Santxo Azkarra (1963), Iruriko Kuntia (1966), Txikito Kanbo (1967), Pette Bereter (1973), Ximena (1979) eta Iparragirre (1980).
Abestiak era asko idatzi zituen. Horietan, Euskal Herriari abesten dio maiz Etxahun-Irurik, Zuberoako bizimoduari (batzuetan mitoari segiz, baina sarri eguneroko gai eta arazoak kantuetara eramanaz), pastoraletako kantoriak ere hainbat prestatu zituen, amodio kantoriak, pilotarie eta baita politikariren bati ere eskainiak, itsasoari, Donostiari eta beste herriei, feste... Frantsesez ere idatzi zituen makina bat abesti asko baitziren orduan ere euskara ulertzen ez zuten Iparraldeko biztanleak. Hauek dira horietariko batzuk: Berea da «Agur Xiberua» famatua, «Goizean argia hastian» bezala, «Anaia etxen da ezkontü», «Pilotarien biltzarra», «Oihanian»... Zuberoko edozein koadrilari entzungo dizkiozunetako asko. Frantsesezko kantak ere baditu (liburu bat bada bere kantekin), ospakizun berezietarako prestatuak. Oraindik bizirik dirau Irurikoaren izpirituak

1979an Pierra Bordazaharre Iruriko bere etxean mintzatu zen astekari honentzako. Lapurdiko Itsasun bizi den Mikel Hiribarrenek egin zion elkarrizketa. «Xinaberri» ezizenez sinatzen zuen, orduan euskal prentsan ohi zenez.
Gaur ere euskalkien idazkerak hainbat buruhauste ematen badu, orduan are konplikatuagoa zen. Batuak berak estandar maila urria zuen. Horri erantsi ordenadorerik kasik ezagutzen ez zen garai hartan artikulu baten produkzio prozesuak zituen arriskuak. Horregatik, 1979an plazaratu bezala argitaratzen dugu berriro, akatsen erantzunkizuna gure gain hartuz. Xinaberrik eskainitako haren mamiak merezi baitu, hogei urte geroago

Urdiñarbetarrek 19 urte geroago «Iparragirre» pastoralaren bi emanaldi eskainiko dituzte. Aitzakia: Pierra Bordazarre, Etxahun-Iruri gisa ezagunagoa izan den bertsolari eta pastoralgilea zendu zela 20 urte beteko dira urriaren 1ean. Zuberotarrak egin zuen azken pastorala izan zen, baina ez zuen gauzatuta ikusi. Bera 1979an zendu bazen, «Iparragirre» pastorala hurrengo urteko udan Jean Mixel Bedaxagarren gidaritzapean antzeztu zen.
Etxahun-Iruriren urtemuga kari, Urdiñarbeko Bil Xokoa kultur elkartekoek 70 aktore bildu dituzte duela 19 urtekoa berriro taularatzeko. Aktore gehienak berberak dira, baina gazteago batzuk ere inguratu dituzte. Urdiñarbeko aktoreak sei hilabetez Battitta Urrüti garindaintarraren esanetara aritu dira. Laguntzaile lanetan aritu dira berriz, Dominika Agergarai eta Erramun Tartachu urdiñarbetarrak.
Iparragirreren, Urretxuko kantari eta olerkari ezagunaren bizitzako joan-etorriak dira ardatz pastoralean. Gipuzkoarraren abestiak bere horretan mantentzeaz gain Pierra Bordazarreren zenbait kantu ere tartekatuko da. Salbuespenak Mixel Etxekoparrek moldatutako «Gernikako Arbola», «Ume eder bat» eta «Hara non diren» abestiak izango dira. Etxakopar izan da baita ere, kantu irakasle. Dantzei dagokionez, ez da aldaketa handirik izango 80ko antzezlana ikusita. Dena dela, herriko dantza eskolakoek Jean-Charles Sainzek moldatutako Sotila koreografia dantzatuko dute.
Etxahun-Iruri 1979ko urriaren 1ean zendu zela gogoan izanik irailaren 26rako eta urriaren 2rako prestatu dituzte urdiñarbetarrek «Iparragirre» pastoralaren bi agerraldiak. Urdinak, gorriak, artzainak, marinelak eta errejentak, beste pertsonaia askoren artean, arratsaldeko 15:00etan estreinatuko dira taula gainean eta bigarren saioa 20:30etan hasiko da. Lehen aldiz pastoral bat aterpean egingo da aurten. Landetatik ekarri dute 2.000 metro karratuko gunea eskainiko duen oihal aterpea. 60 metro ditu luzeran eta 35 metro zabalean