Ariketa fisikorik egiten ez duten pertsonetan, hipertentsio arteriala garatzeko arriskua, normalean ariketa egiten dutenen artean baino % 30-50 handiagoa da. Hala adierazi du Hipertentsioaren Espainiako Elkartearen lehendakariorde Manuel Luque Otero medikuak. Kirolak hipertentsioaren eta beste gaitz kardiobaskularren prebentzioan duen garrantziaz jendea kontzientziatu dadin, Aritu izeneko programa bat jarri zen martxan.
Espainiako biztanleen % 20 hipertentsoa da, eta horietatik bi herenek tratamendua jasotzen dute, baina ez da % 15era iristen bere tentsioa kontrolatua dutenen batez bestekoa. Luqueren iritziz, gaur egun esan daiteke ariketa fisikoa egitea bide egokia dela hipertentsio arterialaren prebentzio primarioa lortzeko. Baita tratamenduan dauden pazienteetan ere, kirolak botiken eragin positiboa gehitu egiten du.
Ikerketa desberdinek frogatu dute ariketa fisikoa egiteak, ordubete gutxienez astean bost egunetan, gutxitu egiten dituela presio arterialaren zifrak, are gehiago tratamendu antihipertentsiboa hartzen ari diren pazienteetan. Knoll laborategiek emandako datuen arabera, ariketak % 25 jaisten ditu kardiopatia koronarioagatiko heriotzak. Baina horretaz gain, obesitatea murrizten du, intsulinaganako sentikortasuna gehitzen eta aldaketa positiboak eragiten ditu plasmaren profil lipidikoan. Eta horiek guztiak eragin mesedegarriak dira osasunerako