Patri Goialde: «Donostiako jazzaldia ez da jazzaldia»

1991ko uztailaren 21an

Patri Goialde jazz musikari eta irakaslearekin
Jazz musikari eta irakasle honekin izan gara solasean
Patri Goialde: «Donostiako jazzaldia ez da jazzaldia»
Euskal Herrian urtero Gasteizen, Getxon, Baionan eta Donostian jazz jalaldiak izaten dira. Jaialdi hauetaz eta batipat Donostiako Jazzaldiaz hitz egin dugu musikari donostiar honekin. Bera, Kursaal Donostiako jazz talde ezagunean aritzen zen eta taldea desegin zela eta Patri Goialde Trio hirukotean dabil orain. Bestalde, Jazzle izeneko musika eskolan egiten du lan irakasle bezala eta bertako arduradun bat da.
ARGIA. Taldean zeintzuk dira zuen proiektuak?
PATRI GOIALDE. Asmo handirik gabe aurrera jarraitzea. Taldea handitzea da orain pentsatzen ari garena. Hirukotearen esperientzia ona izan da baina gustatuko litzaidake pianojole edo abeslari bat sartzea. Aurten hirukotean , Jose Ramon Elkoro baterian, Gonzalo Tejada kontrabaxuan eta ni kitarran gabiltza. Datorren urtean Tejadak taldea utzi eta oraindik ez dakit kontrabaxuaz ala baxu elektrikoaz nor arduratuko den.
A. Jazzlen egiten duzu lan, noiz sortu zen musika eskola hau?
P.G. Orain hiru urte, aurtengoa hirugarren ikasturtea izango da. Bertan, musika modernoa eta jazza erakusten dugu. Gaur egun, erakusten den musika bakarra klasikoa da eta orain arte, berbena, rock zein jazz munduko jendeak ez zuen ikasteko leku egokirik. Nahiz eta bertan ikastea nahiko garesti samarra izan ekimen pribatu guztiak bezala, ikasle asko izaten ditugu urtero, bataz beste laurogeitamar. Inguruan eskolarik ez dagoenez kanpotik ere etortzen da jendea; bai Bilbo, Iruñea, Gasteiz eta Santanderretik.
Diru laguntza txikiak jasotzen ditugu zenbait arazori aurre egiteko eta instrumentuak erosteko, baina subentzio handi bat beharko genuke. Jazza bestalde, piskanaka sartzen ari da kontserbatokietan, aurten adibidez Donostiako kontserbatokian izan gara ikastaro bat ematen. Interesgarria izango litzateke hildo horretatik jarraitzea.
A. Zenbat jazz eskola dago Euskal Herrian?
P.G. Nik dakidala gurea bakarrik. Musika klasikako zenbait eskoletan badago jazz edo musika modernoa erakusten duen irakaslerik eta leku batzutan jazza ere erakusten da lagunen artean, baina eskola bezala dagoen bakarra Jazzle da.
A. Zer iruditzen zaizu aurtengo Donostiako Jazzaldiko egitaraua?
P.G. Donostiako Jazzaldiak norabidea galduta dauka batez ere jazz izenpean musika estilo asko lantzen direlako. Ez da aurtengo kontua, Santi Ugarte dagoenetik da. Hala ere ez da izan Santi Ugarteren errua bakarrik, Udaletxeko Kultura saileko arduradunena ere izan da.
Donostiako Jazzaldia ez da jazzaldia, baditu jazz emanaldi batzuk baina gehienak jazz ez diren musika estilokoak dira. Gainera hemen asmoa jazzaldi handi bat egitea da eta jende asko erakarri, baina argi dago musika estilo honek ez duela hainbeste jende erakartzen. Asmoa jazzaldi bat egitea bada, benetako jazzaldi bat, jakina da ez dela hainbeste jende etorriko eta Belodromoa beraz, handi samar geratzen da. Anoetako Belodromoa leku handiegia da, jazz emanaldiak beste toki batean egin behar dira
Gaur egun ez dago leku handi bat betetzeko hainbeste publiko eta txikiago bat bilatu behar da.
A. Antolatzaileek esaten dute Jazzaldian jazz musika bakarrik egongo balitz jaialdietara oso jende gutxi joango litzatekeela eta horregatik jorratzen dutela beste zenbait estilo
P.G. Betiko kontua da. Ekitaldi kultural guztiak defizitarioak dira eta izango dira; hori badakigu eta Jazzaldian beti galduko da dirua. Zergak ez dira farolak jartzeko edo errepideak egiteko bakarrik. Zergen bidez lortzen den dirua kulturan ere gastatu behar da.
Nik ez dakit zergatik planteatzen den beti gauza bera, jazza minoritarioa dela eta, jende gehiago etortzeko jazzaldia izenaz beste musika estilo batzuk ere landu behar direla. Baina jazzaldia ezin bada antolatu ez da antolatzen eta ez da ezer gertatzen, musika jaialdi zabal bat egiten da eta kitto. Gero jazzaldi txiki bat antolatu daiteke neguan edo besterik ez bada zenbait jazz kontzertu. Nik ez nuke gaizki ikusiko Gipuzkoan edo Euskal Herrian hainbeste publiko ez dagoela ikusirik, Jazzaldia aurrera eramatea ezinezkoa denez beste zerbait antolatzea.
Beraz, arazo ekonomikoa ez dut garbi ikusten. Jazza defizitarioa da, ikusi behar da merezi duen ala ez jazz jailadia egitea.
A. Donostiako Jazzaldiaren aurkezpenean Santi Ugarte antolatzaileak esan zuen Montreauxen, La Hayan eta Nizan izaten diren jaialdi nagusienak jazza ez den beste musika estiloetara ere ireki direla...
P.G. Hori egia da baina Montreauxen adibidez era guztietako kontzertuak egin dira betidanik. Jaialdia gainera ez da bost egunetan egiten, hogei egun izaten dira. Hogei egun horietatik zenbait egunetan jazz musika erakusketa bat egiten da eta lau, bost, sei egunez izaten dira jazz emanaldiak. Jaialdia luzea izanik denetarik dago.
A. Aurten Donostian kalean ez da kontzerturik izango...
P.G. Ez. Gauez beti bezala zenbait tabernetan izango da emanaldirik eta uste dut beste urteetan bezala Jazzaldiak subentzionatuko dituela.
Esaten dute erakusketa bat egongo dela baina iragan urteko disko erakusketa adibidez lotsagarria izan zen.
Bestalde belodromoaz gain, giro bakarra Altxerri, Etxekalte eta Be Bop tabernetako zuzeneko emanaldietan izango da.
A. Nola tratatzen da bertako jazza jaialdian?
P.G. Ez da tratatzen. Ez dago. Jean Mari Eckay izango da parte hartuko duen musikari euskaldun bakarra. Eckay, Didier Lockwood biolinjolearekin etorriko da bere musikari taldearen barnean.
A. Euskal Herrian bestalde, Baiona, Getxo eta Gasteizen beste hiru jazz jaialdi ere izaten dira...
P.G. Getxokoa goruntz doa. Jazz jaialdi hau orain urte gutxi hasi zen, eta polita iruditzen zait han egiten dutena: Europan egiten den jazza isladatzea. Gainera estatu espainiarrean egiten den prestigio handien duen lehiaketa hor izaten da. Lehiaketan emanaldiak ordaindu egiten dituzte, normalean egiten ez dena. Aurten berrogei taldeek parte hartu dute. Estatu espainiarrean dabiltzan talde guztiak joaten dira hara, bai amateurrak, bai profesionalak.
Gasteizkoa ondo dago. Aurten Oscar Peterson izango da berriz ere, azken urtetan laupabost aldiz izan da. Gehiegi errepikatzen dira musikari famatuak baina jaialdiak bere bidea jarraitzen du, Iñaki Añua zuzendariak jarritakoa eta beti zerbait berria eta erakargarria izaten dute. Jazz hutsa ez diren kontzertuak ikusteko aukera ere badago, baina jazzarekin nolabaiteko lotura dutenak. Manhattan Transfer laukotea adibidez bertan izan da jotzen, talde honek saltsa, pop eta beste musika estiloak jorratzeaz gain jazz inguruko kantak ere jotzen ditu. Jendea erakartzeko jazz hutsa ez diren taldeak ekartzen dituzte baina euren musikak badu jazzarekin erlaziorik. Hau ez da Donovan eta Donostian izango diren beste batzuen kasua.
Baionako jazzaldia gutxi ezagutzen dut eta nere informazio iturriak oker ez badaude jaialdia nahiko irekia da eta blues nahiz rithm'n'blues estiloak ere lantzen dira bertan.
Joxi Goikoctxea
Nahiz eta Donostian aurten kalean kontzerturik ez egon, gauez zenbait tabernatan izango da zuzeneko emanaldirik.
Getxoko jazz jaialdian egiten den lehiaketa prestigio handikoa da eta bertan estatu espainiarreko talde guztiak parte hartzen dute.
46-48

GaiezKulturaMusikaMusika modePertsonakMusikoakGOIALDE1
PertsonaiazGOIALDE1
EgileezGOIKOETXEA7Kultura

Irakurrienak

Matomo erabiliz

Lagunak, adiskideak eta beste hainbat etsai

Gorka Bereziartua

Nola landu desirak, aniztasun sexuala edota identitatea 12-18 urteko ikasleekin?

Mikel Garcia Idiakez

Manifestazio eta aldarri ugari Maiatzaren Lehenerako

Gorka Peñagarikano Goikoetxea

Hezkuntza komunitateak protestara deitu du Palestinako haur eta nerabeen alde

Gorka Peñagarikano Goikoetxea

2x11: Odei Barroso | Erabakiak hartzea

ARGIA

Azkenak

2024-04-30 | ARGIA

Netanyahuk dio Rafah inbadituko dutela su-eten akordioa "egon zein ez egon”

34.000 palestinar baino gehiago hil ditu Israelek urriaren 7az geroztik Palestinan, eta beste milaka dira desagerturik edota larri kolpaturik. Jarraipena egiten ari gara.

2024-04-30 | Zigor Olabarria Oleaga

Netanyahuk dio Rafah inbadituko dutela su-eten akordioa "egon zein ez egon”

Israelek 40 eguneko su-etena eta preso trukea eskaini dio Gazari, baina akordioa lortu edo ez Rafah inbadituko dutela adierazi du Netanyahu lehen ministroak. AEBk eta Erresuma Batuak Hamas presionatzen ari dira Israelen eskaintza onar dezan. Astelehenean 47 palestinar hil zituen... [+]

2024-04-30 | ARGIA | ARGIA

Hil egin da Artzentalesen zauritu zen basogintzako langilea

Langilea larri zauritu zen apirilaren 24an, eta astelehenean, hilak 29, hil da. 22 urte zituen eta sektorean bi hilabete soilik zeramatzan lanean. 2024 urtean hildako 22. langilea da.

2024-04-30 | ARGIA

Eneko Bidegainen 'Bichta éder' eleberriak jaso du 111 Akademiaren Saria

Karmele Jaioren Maitasun kapitala-rekin lehiatu da finalean. 2023ko “libururik gogokoen” izendatu dute Bidegainen “bihurgune askotako” thriller politikoa 111 Akademia osatzen duten literaturazaleek.

2024-04-30 | Bitor Abarzuza Fontellas

Sustapen sozialeko etxebizitzak herritar guztiontzat orain!

Eguneraketa berriak daude