ARGIA.eus

2020ko maiatzaren 26a

Tsunami Demokratikoaren deialdiak milaka lagun mobilizatu ditu Bartzelonan

  • Tsunami Demokratikoak mobilizazioa deitu du Espainiako gizonezkoen Futbol Ligako Bartzelona-Real Madril norgehiagokaren egunean. Milaka herritarrek egin dute bat deialdiarekin. Camp Nou estadio kanpoan Poliziak zaurituak eragin eta hainbat lagun atxilotu ditu. Independentismoaren aldarrikapenak estadio barnean ere ikusarazi dituzte, baina Tsunamik onartu du prestatua zuen ekintza ikusgarriena poliziak galarazi duela: estadiora droneekin pankartak sartzea.

Igor Galarza Intxausti @IgorGalarza
2019ko abenduaren 18a
Argazkia: Tsunami Demokratikoa.

Espainiako ginonezkoen Futbol Ligako 'klasikoa' jokatu dute asteazkenean, 20:00etan, Bartzelonan. Tsunami Demokratikoak duela aste batzuk iragarri zuen Bartzelona eta Real Madrilen arteko partidaren egunean mobilizazioa egingo zuela. Eta jendeak, partiduaren ordua gerturatu ahala, deialdiari erantzun dio. 16:00etan jarri du ordua ekimenak, eta hiriko lau puntu desberdin zehaztu ditu protestarako.

 

 

Milaka lagun batzen hasiak dira 16:00tatik. Argazkia: Tsunami Demokratikoa.

 

 

Mobilizazioa hasi aurretik testu bat zabaldu du Tsunamiak sare sozialen bidez. Jakinarazi du 100.000 kartulina banatuko dituztela "Spain sit and talk!" (Espainia, eseri eta hitz egin!) lemarekin. Polizia indarrei neurrigabekeria saihesteko eskatu die. Azkenik, gogoratu du "indarkeria eza" dela Tsunamiaren ekintzen oinarria, eta "herriaren indarra" nabarituko dela adierazi du. Horrez gain, Camp Nou futbol zelaiaren inguruan eta bi taldeak kontzentratuta dauden hotelaren kanpoaldean papertxoak zabaldu dituzte herritarrek, Espainiako prentsaren manipulazioa eta Espainiako Gobernuaren eta polizia indarren gehiegikeriak salatzeko.

Asteazken goizean hainbat hedabidek zabaldu dute protestaren ardatzetako bat pilota handi batzuen jaurtiketa izan daitekeela. Pilota horiek barruan pintura izan dezaketela da polizien ustea. Tsunamiak umorez eta ideia bere eginez erantzun dio "filtrazioari".

 

Milaka herritar eta milaka polizia

Poliziaren presentzia izugarri handia izan da Camp Nou estadioaren inguruan goizetik. Miaketa ugari egin ditu poliziak, eta teilatuetatik zelatatu dituzte manifestariak. Guztira 3.000 polizia baino gehiago daude mobilizatuak, guardia zibilak eta espainiako poliziak barne. Camp Nou futbol zelaiaren inguruan dozenaka milaka herritar batu da protestan partida hasi aurretik. Polizia eta manifestarien arteko tentsioa gora egiten joan da. Estadioan partida hasita zegoela jada, kalean polizia manifestarien aurka oldartu da. Sanitaris per la Republic taldeak 125 zauritu artatu ditu, eta errepresioaren aurkako Alerta Solidaria mugimenduak gutxienez bederatzi atxilotu egon direla adierazi du. Istiluak izan dira manifestari eta polizien artean, eta su barrikada batzuk piztu dituzte manifestariek.

Argazkia: Anonymous Catalonia.

 

Camp Nou barneko protesta, erdibidean

Bartzelona futbol taldeko segurtasunak Tsunamiren kartelak errekisatu ditu estadiorako sarbideetan. Tsunamiak "zentsura" salatu du. Baina herritarrek lortu dute afixak sartzea. Partidaren hasieran armailek irudi ikusgarriak eman dituzte, herritarrak "Spain sit and talk!" afixak eskuetan eta independentziaren eta preso politikoen askatasunaren aldeko leloak oihukatuz. Partidaren bigarren zatian zaleek pilota puzgarriak bota dituzte zelaira, eta partida etena egon da tarte batez.

 

Estadio barnean prestatua zegoen ekintza ikusgarriena beste bat zen, ordea. Dron batzuen laguntzaz bi pankarta erraldoi kokatu nahi zituen Tsunamiak futbol zelaiaren erdian. Tsunamiak berak onartu du ekintza horren porrota, eta jakinarazi du mossoek galarazi dutela ekintza. Edonola dela, egunaren balorazio positiboa egin du ekimen desobedienteak: "Bigarren fase hori [Camp Nou barneko ekimenak] ekintza handi batekin indartuta zegoen, eta poliziaren jardunagatik ez da arrakastatsua izan. Tsunamiak ez du aitzakiarik jartzen. Epic fail? Tsunamik ez du uste horrela denik. Jendeak ez du huts egin, eta argi du honek jarraitzen duela autodeterminaziorik, eskubiderik eta askatasunik ez dagoen bitartean". Asteazkeneko ekintzak eta bere emaitzek Tsunamiaren ekiteko moduen eta eraginkortasunaren inguruko askotariko iritziak eta eztabaidak sortu dituzte komunikabideetan eta sare sozialetan.

 

ARGIAn egiten dugun kazetaritza independenteak bultzada merezi duela uste duzu?

Informazio askea lantzen dugu ARGIAn, langileok gara proiektuaren jabeak eta gure informazioen atzean ez duzu sekula multinazionalik, bankurik edo alderdi politikorik topatuko. Gure ustez, burujabetza guztien oinarrian dago informazio burujabetza, ezagutzen dugunaren gainean pentsatzen eta erabakitzen dugu. Horregatik diogu kazetaritza independentea dela demokraziaren oinarrietako bat.

Aldizkaria paperean etxean edo e-postan PDFan jaso nahi duzu? Pozik hartuko zaitugu ARGIAko komunitatean. ARGIAkoa izateko, nahi eta ahal duzun ekarpena egin dezakezu, eta bueltan egoki ikusten duzuna eskatu. Indartu dezagun indartzen gaituena!


Katalunia independentziarantz kanaletik interesatuko zaizu...

Azkenak
EGILEA
Argia buletina
Egunaren laburpena
zure e-postan
Eguneraketa berriak daude