Kritikak eragin ditu espazio publikoa arautzeko debeku eta isunetan oinarritutako ordenantzak, kritikoek "mozal ordenantza" gisa berrizendatukoak. Arrasaten edo Tolosan dagoeneko aplikatzen ari dira, Zumaiako Udalak ere asmo bera adierazi du, eta Alonsotegiko Udala ere bide beretik zihoan, prozesua etetea erabaki duen arte. Herritarren protestak izan dira udal gobernua ordenantza birpentsatzera eraman dutenak, Naiz-ek zabaldu duenez. Arauari lehen onarpena eman eta buletin ofizialean publikatu ondoren hasi da mozal ordenantzaren kontrako mugimendua sortzen, eta maiatzaren 26an ehun bat alegazio aurkeztu dituzte.

Garbitasunaren izenean

Gune publikoak garbi mantentzearekin arrazoitzen dute ordenantzaren aldekoek araudia, eta informaziorako eta adierazpen askatasunerako eskubide urraketa aurpegiratzen dizkiote aurkakoek. Geldiarazi duten ordenantzak besteren artean kartelak edo pankartak gune publikoetan jartzea debekatzea ekarriko luke, edo kartelentzako prestatutako paneletan edozein informazio jarri aurretik gainbegiratu beharra.

Oraingoz gelditzea erabaki du Alonsotegiko Udal plenoak, eta prozesu parte-hartzaile bat jarriko dute martxan ordenantzaren puntuak herritarrekin eta eragileekin definitzeko.