Kakitzat koordinakunde antimilitarista “gizarte desmilitarizatu” baten alde manifestatu da asteazken goizean, Bilboko kuartel militarraren aurrean -antzinako Gobernu Militarra-. Soldadutza garaian intsumisio kanpainan parte hartu zuten lagunetako batzuek parte hartu dute. NATOren, gastu militarraren igoeraren eta Bilboko Portutik esportatzen diren armen kontra protestatu dute besteak beste, “Hoy más que ayer militarismorik ez!” lelopean.

Duela 30 urte, otsailaren 20an, 57 gazte intsumiso estatuko hainbat Gobernu Militarretan aurkeztu ziren, eta haietako hamaika presondegi militarretara bidali zituzten. Atxilotuetako hiru bizkaitarrak ziren, eta Mungiako kuartelera eraman zituzten. Horregatik aukeratu du Kakitzat elkarteak egun hau ekimena egiteko.

Intsumisioaren kanpaina hamabi urtez luzatu zen, 1989ko otsailetik nahitaezko soldadutza bertan behera utzi zen egunera arte, 2000. urteko abenduaren 31ra arte, alegia. Tarte horretan, estatuko 25.000 lagunek, haietako 12.000 Euskal Herrian, intsumiso deklaratu zuten euren burua; haietako 1.670ek kartzeletan edo presondegi militarretan bukatu zuten.

Albiste hau Elhuyarrek argitaratu du eta CC-by-sa lizentziari esker ekarri dugu ARGIAra.