Jornalari bat zendu da Murtziako Lorca udalerrian (Espainiako Estatua), bero-boladan ustiategi batean lanean aritzeagatik. Larunbatean, bero handiak eraginda, ondoezik abandonatuta utzi zuten 42 urteko gizon nikaraguarra osasun zentro batean. Horren ondorioz, ustiategiaren jabea atxilotu du Guardia Zibilak; langileen eskubideen aurkako delitua leporatu diote, Público egunkariak jakinarazi duenez.

Puerto Lumbrerasko El Esparragal auzoan gertatu zen. Murtziako Eskualdeko Larrialdiak Koordinatzeko Zentroak dei bat jaso zuen larunbatean, 15:37ak aldera. Deitzaileak Larrialdietako Unitate Mugikorra eskatu zuen, Lorca-Sutullena Osasun Zentroko Larrialdi Zerbitzuan utzitako gizon bat artatzeko.

Deian jakinarazi zutenez, furgoneta batek konorterik gabe utzi zuen gizona, eta ez zen inor geratu berarekin batera. Larrialdi Sanitarioetako Unitate Mugikorra bertaratu zen arren, ezin izan zuen ezer egin langilearen bizitza salbatzeko. Azkenik, Espainiako Poliziari eta Laneko Segurtasun eta Osasun Institutuari deitu zieten, landa-eremuko langilea zela ikusirik.