Emakumeak borrokan

Lehendakariak dio ez zekiela ezer irregulartasun zantzuak dituen Lanbide Heziketaren finantzazioaz

  • ARGIAn eman genuen esklusiba: Lanbide Heziketako irakasleak enpresaz enpresa proiektuak saltzera bultzatzen ditu Jaurlaritzaren programa batek eta enpresei saldutako proiektuen arabera diru publiko gehiago edo gutxiago jasotzen dute ikastetxeek. Erreportajearen ostean, programa horretan “irregulartasun zantzuak” antzemanda hainbat galdera luzatu dizkio Iñigo Urkulluri EH-Bilduk, baina horren guztiaren berririk ez zuela erantzun du lehendakariak, eta zalantza asko argitu gabe gelditu dira.

Mikel Garcia Idiakez @mikelgi
2019ko martxoaren 04a
I˝igo Urkullu eta Cristina Uriarte, TKnikara egindako bisita batean (Arg: Irekia)

Lehendakaritzaren izenean egiten den eta Lehendakaritzatik zuzenean 1.400.000 euroko partida duen programaren jarraibideaz berririk ez duela adierazi du Urkulluk: ez ikastetxeetara bidaltzen diren eginbeharrez, ez programak duen %25eko diru-laguntzaz, ez zein irizpideren arabera osatzen den ikastetxeek jasotzen duten enpresen zerrenda, gero irakasleek enpresa horien atea jotzeko. Urkulluk argudiatu du programa horren garapen operatiboa Lanbide Heziketako Sailburuordetzak daramala, eta horregatik, Rebeka Ubera legebiltzarkideak lehendakariari zuzendutako galderak Sailburuordetzak erantzun ditu.

Sailburuordetzak, ordea, ez ditu hainbat gauza argitu. Programa arautzen duen dekreturik ba al dagoen galdetuta, irakasleen rolari buruzko arau orokorrekin erantzun dute, baina ez da ematen programari lotutako inongo dekretu zehatzen berri. Irakasleek enpresei egindako lan bakoitzagatik ikastetxeak jasotzen duen %25eko diru-laguntza publikoa ofizialki jasota al dagoen ere ez da argitzen. Eta ikastetxeetara bidaltzen den zerrenda ea zein irizpideren arabera osatzen den eta zerrendan parte hartzeko deialdi publikorik ba al dagoen galdetuta, ikastetxeek “informazio gisa” erabiltzeko zerrenda bat dela erantzuten da, garrantzia kendu nahian.

Irakasleak komertzial lanetan

Sailburuordetzak dio irakasleak ez direla saltzaile lanetan ari. Baina artikuluan nabarmendu genuenez, parte hartzen duten ikastetxe guztiak urtean gutxienez 30 enpresa bisitatzera derrigortzen ditu programak, eta enpresei egia ez kontatzeko esaten die Jaurlaritzak irakasleei, ARGIAk eskuratutako dokumentuan: “Ikastetxeak bisitak egiteagatik diru bat jasotzen duela ikusarazten badiegu enpresei, laguntzera gerturatzen den agente bat bezala ordez, gerta liteke bisitak egiteko interesa duen agente bat bezala ikus gaitzatela”. Alegia, komertzial bat bezala.

Programa, diote, “ez da irakasleentzako obligazio gisa planteatzen, baizik eta parte hartzeko gonbidapen” gisa. Artikuluan kontatu genuenez, baina, diru-iturri inportantea bihurtu da programa hau Lanbide Heziketako ikastetxeentzat eta hortaz, pentsatzekoa da ikastetxe batek baino gehiagok bere burua hein batean behartuta ikustea lehia horretan parte hartzera, dirua lortzeko.

Sailburuordetzaren arabera, “ikastetxeen finantzazioa ez dute zehazten hainbat enpresetara egindako bisitek”, baina programa honek 1.400.000 euroko diru-poltsa banatzen du ikastetxeen artean, eta zenbat eta enpresetara bisita gehiago egin eta proiektu gehiago saldu, orduan eta baliabide ekonomiko eta pertsonal publiko gehiago jasotzen ditu ikastetxeak. Hori ez al da finantzazioa baldintzatzea? Bitxia da Sailburuordetzaren planteamendua: berriz dio helburua ez dela “ikastetxeen jarduera finantzatzea, baizik eta bere irakasleengan trebetasun eta gaitasun berriak sortzen laguntzea”.

Hezkuntza sailburuak azalpenak eman beharko ditu Legebiltzarrean

Lehendakariari galderak bidaltzeaz gain, Rebeka Uberak bi agerraldi eskatu ditu Eusko Legebiltzarrean: Cristina Uriarte Hezkuntza sailburuarena bata, Jorge Arévalo Lanbide Heziketako sailburuordearena bestea. Programa honen inguruan eta oraindik argitu ez dituzten zalantzei buruzko azalpenak eskatuko zaizkie.

 

ARGIAn egiten dugun kazetaritza independenteak bultzada merezi duela uste duzu?

Informazio askea lantzen dugu ARGIAn, langileok gara proiektuaren jabeak eta gure informazioen atzean ez duzu sekula multinazionalik, bankurik edo alderdi politikorik topatuko. Gure ustez, burujabetza guztien oinarrian dago informazio burujabetza, ezagutzen dugunaren gainean pentsatzen eta erabakitzen dugu. Horregatik diogu kazetaritza independentea dela demokraziaren oinarrietako bat.

Aldizkaria paperean etxean edo e-postan PDFan jaso nahi duzu? Pozik hartuko zaitugu ARGIAko komunitatean. ARGIAkoa izateko, nahi eta ahal duzun ekarpena egin dezakezu, eta bueltan egoki ikusten duzuna eskatu. Indartu dezagun indartzen gaituena!


Iruzurra Lanbide Heziketan? kanaletik interesatuko zaizu...
Azkenak
EGILEA
Eguneraketa berriak daude