ARGIA.eus

Itzulpen automatikoa / Machine translation

"Ikasle ekintzaile eta iraultzaile oro gonbidatuta dago eskola ibiltarira"

  • Uztailaren 25etik 28ra, XIII. Eskola Ibiltaria antolatu du Ikasle Abertzaleak ‘urrats bat marraztuz etorkizunean’ lemapean. Mattin Intxausti Eskola Ibiltariko antolatzaileetako batek xehetasun guztiak azaldu dizkigu.


2018ko uztailaren 03an - 08:20
2014ko eskola ibiltaria (Argazkia: IA)

“Aisialdi euskaldun bat eskaintzetik harago, gazteok elkarrekin formakuntza prozesu bat aurrera eramatea da gure asmoa, beraz ikasle ekintzaile eta iraultzaile oro gonbidatuta dago eskola ibiltarira” dio Intxaustik.

Irurtzunetik Altsasura arteko ibilbidea egingo dute egun horietan. “Goizero egingo dugu hiru ordutako ibilaldia”, azaldu du. “Lehen egunean, Irurtzunetik Uharte Arakilera; bigarren egunean, Uharte Arakiletik  Etxarrira; hirugarren egunean, Etxarritik Altsasura”.

Eduki kritikoaren lanketa egingo dute gazteek eskola ibiltarian, horregatik, formakuntza teoriko zein praktikoak antolatu dituzte. “ Ordu bateko bloke teorikoetan egoeren analisia egingo dugu, ondoren  bi ordutako bloke praktikoan, gizartea eraldatzeko gaitasunak eskuratzen ahaleginduko gara”.

Nekatuta bazaude akeita gunea

Mota guztietako gaiek izango dute presentzia eskola ibiltarian: okupazioa, hezkuntza, feminismoa, komunikazio politikoa, segurtasun informatikoa eta abar. “Bakoitzari egokitzen zaion kolorearen arabera, gai desberdinak jorratuko ditu”, azaldu du Intxaustik.“Tailerrak egiteko orduan, norbait nekatuta egotea ere gerta daiteke, horregatik, herri guztietan gune lasai bat ere badugu, ‘akeita gunea’” gaineratu du.

Lau pareten artetik ateratzeari garrantzia ematen dio Ikasle Abertzaleak, “egun guztian leku itxi batean egoteak ez dio buruari laguntzen”. Gainera, gela baten barruan egoteak ez duela sozializatzen laguntzen adierazi du antolatzaileak, “ordea, goizeko paseoak sozializatzeko aukera emango digulakoan gaude”.

Parrandari ere egin diote tartea eta Altsasun kontzertuen eskaintza egongo da. Herriko plazan: Bultz, Kop, Nafarroa 1512 eta Droga Púrpura. Gaztetxean: Eztanda, Katez, Niri Bortz eta MTR DJ´s.

Bono mota desberdinak daude salgai, ez dago zertan lau egunetarako joan. Hemen sakatuz gero ikusi daitezke salmenta puntuak.

Ibilaldiaren beldur ez izateko dio Intxaustik, “motxilak eramateko garraioa dago, beraz, ez geratu etxean eta animatu!”.

 


Kanal honetatik interesatuko zaizu: Eskola Ibiltaria
Ostegunean hasi eta larunbatean amaituko da Eskola Ibiltaria, Ikasle Abertzaleakek antolatuta

Aurtengo edizioan Eskoriatza, Aretxabaleta eta Aramaio igaroko dituzte. Tailerrak, bertso-saioak, hitzaldiak, kontzertuak, eta abar antolatu dituzte hiru egunez. “Hausnarketarako eta formakuntza politikorako espazioa” izatea dela helburua azaldu dute.


2019-07-10 | Hala Bedi
Nahia eta Urko (Ikasle Abertzaleak)
"Elkarren arteko zaintza eta garatzen ari garen prozesu sozialista lantzeko egunak izango dira"

Eskola ibiltariak egongo dira uztailaren 23a eta 26a bitartean.


2018-07-10 | Topatu.eus
Eskola Ibiltariko egitarau osatuaren berri eman dute Ikasle Abertzaleek

Askotariko hitzaldi, tailer eta kontzertuak eskainiko dituzte uztailaren 25etik 28ra egingo duten martxan. Jakinarazi dutenez, aforo mugatua duten ekitaldietan bonoa dutenek izango dute lehentasuna. Euskal Herriko hainbat txokotan jarri dituzte salgai.


Eguneraketa berriak daude