Espainiako Auzitegi Nazionalak auto irmoan zehaztu denez, zigorraren hiru laurdenak beteak ditu Gorka Frailek eta "gizarteratzeko pronostiko indibidualizatu eta aldekoa du, tratamendu batzordearen txostenaren arabera". Durangoko presoa gaixo larri dago 2015etik, epidermoideoko kartzinoma diagnostikatu baitzioten.

Joan den abenduan, Fraileri hirugarren gradua emango ziola iragarri zuen Espainiako Auzitegi Nazionaleko Espetxe Zaintzak. Bigarren mailan zegoen ordurako, eta hainbat espetxe baimen arrunt prest zituen. Ondorioz, urtarriletik Iruñeko CISen zegoen, eta espetxera gaua pasatzera joaten zen.

Koronabirusagatik alarma egoera dekretatu zutenean, presoak ez kutsatzeko neurri gisa, agindu zioten ez kartzelara joateko lotara. Espetxe Erakundeek teorikoki hirugarren graduan dauden preso guztientzat emandako neurria da, nahiz eta ez diren aplikatzen ari kasu guztietan.

Naizen errepasatu dutenez, Frailek lehenik eta behin lortu zuen bigarren gradura pasatzea, irteera baimenak lortzea ondoren, hirugarren gradua eskuratzea ondoren (eta honekin batera Iruñera eramatea), eta azkenik, aske geratzea lortu du.

Fraileren antzeko egoeran, hiru laurdenak beteta edo 2020. urte honetan betetzeke, beste 73 euskal preso politiko daude. Horietatik 28 bakarrik daude bigarren graduan eta zortziri bakarrik eman dizkiete espetxetik irten eta sartzeko baimen arruntak.