ARGIA.eus

2020ko abenduaren 03a

Etxegarai da berriz ere Euskal Elkargoko presidentea, botoen %63,8 bildurik

  • Euskal Hirigune Elkargorako presidente izaten segituko du ondoko sei urteetan. Hautagaitza bakarra izanda ere, hamasei boz bildu ditu Alain Iriart abertzaleak, bi Claude Olive Angeluko auzapezak eta bat Bernard Lougarot Gotaine-Irabarneko auzapezak. Zuri bozkatu dute 65 hautetsik.

Jenofa Berhokoirigoin @Jenofa_B
2020ko uztailaren 17a
Euskal Elkargoaren biltzarra

Aurreikusitakoa gertatu da Euskal Hirigune Elkargoaren presidentetzarako bozketan: hautagai bakarra izanez, Jean-Rene Etxegarai orain arteko lehendakaria izanen da berriz ere ondoko sei urteetan egiturako presidentea. 232 hautetsi dira instituzio horretan kargudun eta hauetarik 148k bere alde bozkatu dute; 65 boto zuri ere izan dira.

Nahiz eta haien hautagaitza ez aurkeztu, hamaseik bozkatu dute Alain Iriart Hiriburuko auzapez abertzalearentzat, bik Claude Olive Angeluko auzapezarentzat eta bakarrak Bernard Lougarot Gotaine-Iribarneko auzapezarentzat.

Oroit gara Iriartek plazaratu zuela hautagai izateko xedea baina EH Bai koalizioak hautagaitza abertzalerik ez aurkezteko hautua egin zuela, lehenetsiz Etxegaraien aldeko apostua egitea, "ordezkaritza azkarra" eskuratuz gobernantzan. Hori horrela, hautagaitzarik ez du aurkeztu Iriartek eta hala ere, hamaseik botoa bideratu diote.

Presidentea hautaturik, uztailaren 31an dituzte Kontseilu Exekutiboa eta Prestatze Kontseilua osatuko.

Gobernantzaren II. Paktua

2017an bozkatu zuten I. Gobernantza Paktua berriz eztabaidagai jarri eta II. Paktua bozkatuko dute ondoko batzarrean. Anartean, uztailaren 17 honetan eztabaidatzen dabiltza gobernantzaz. Demagun, Paulo Arzelus Aramendi Hendaiako hautetsiak paktuaren baitan "euskararen erronka" bai ala bai kontutan hartzeko beharra azpimarratu du. Zehazki, ondokoak azpimarratu ditu: gure hizkuntza komunitatearen eskubideak errespetaraztearen alde lanean segitzeko beharra baita ere legea aldarazteko premia, koofizialtasuna lortzeko bidean.

Instituzioaren antolaketa zentralista behin baino gehiagotan kritikatua izan da, batez ere baserri munduko hautetsien partetik. Ohar horiek kontutan hartu nahian dabil Etxegarai eta "eraginkortasuna" eta "hurbiltasunaren bermea" uztartzeko gogoa adierazi du hitzartzean.

2015. urteko Frantziako lurralde antolaketa berriaren legeak ahalbidetu zuen Euskal Hirigune Elkargoaren sorrera, nonbait urte luzeetan aldarrikatu ezagupen instituzionalari emandako erantzun gisa.

 

ARGIAn egiten dugun kazetaritza independenteak bultzada merezi duela uste duzu?

Informazio askea lantzen dugu ARGIAn, langileok gara proiektuaren jabeak eta gure informazioen atzean ez duzu sekula multinazionalik, bankurik edo alderdi politikorik topatuko. Gure ustez, burujabetza guztien oinarrian dago informazio burujabetza, ezagutzen dugunaren gainean pentsatzen eta erabakitzen dugu. Horregatik diogu kazetaritza independentea dela demokraziaren oinarrietako bat.

Aldizkaria paperean etxean edo e-postan PDFan jaso nahi duzu? Pozik hartuko zaitugu ARGIAko komunitatean. ARGIAkoa izateko, nahi eta ahal duzun ekarpena egin dezakezu, eta bueltan egoki ikusten duzuna eskatu. Indartu dezagun indartzen gaituena!

Kanal hauetan artxibatua: Euskal Elkargoa bozkak 2020  |  Baiona  |  Euskal Elkargoa

Euskal Elkargoa bozkak 2020 kanaletik interesatuko zaizu...





Azkenak
EGILEA
Argia buletina
Egunaren laburpena
zure e-postan
Eguneraketa berriak daude