Apirilaren 28an Hendaian jarri zuten martxan karabana. 150 lagun inguru batu ziren lehen unetik ekimenera, baina beste hainbestek parte hartu zuten herriz herri eginiko ekitaldietan. Hendaiako Etorkinak Barneratzeko Zentroaren aurrean elkartu ziren karabanako kideak eta Ipar Euskal Herriko hainbat eragile, tartean Cimadeko kideak. Azken hau, Frantziako Estatuan errefuxiatuen eskubideen alde eta zentro hauen aurka diharduen GKE da. Aurretik, jada, zentro beraren aurkako ekintzak egin dira, ixteko asmotan.

Hendaiatik Irunerako bidean Santiago zubian egin zuen parada karabanak. Harresi moduko bat irudikatu zuten sare laranja baten bidez, bi estatuen arteko muga irudikatuz. Pertsonen zirkulazio askea aldarrikatzeko sarea moztu zuten. “Zer gertatzen da Hendaia eta Irun artean? Egunero-egunero bertatik pasatzen diren paperik gabeko pertsonak beraien jatorrizko herrialdera itzularazten dituzte”, azaldu du Fernandezek.

Harresiak apurtu!! Vayas donde vayas rompe la valla! Mugan gaude, guk libre pasa dezakegu, zergatik haiek ez? @errefuxiatuakB @ArabaOee @MugakZabalduz pic.twitter.com/BtaQgZR597

— RefugiadxsGipuzkoa (@onetergi) 28 de abril de 2018

Irundik Andoainera abiatu ziren. Bertan, SAPA armagintza enpresaren aurrean protestak egin zituzten. Gerrak etxean hasten direla eta parte-hartze zuzena duen industria gurean dela gogoratuz. Harrera beroa jaso zuten Udalaren eta herritarren aldetik.

Gipuzkoa atzean utzi eta Nafarroara joan ziren. Ordu arte bezala, karabanak babes zabala jaso zuen Iruñean. Oraindik ere argitu gabe dagoen Elhadi Ndiaye senegaldarraren heriotza salatu zuten. 2016an Iruñeko polizia etxean hil zen. Udaletxe aurrean elkarretaratzea egin zuten.

Tutera-Gasteiz. Mendebaldearen ardura

Iruñean lo egin ostean, hegoalderantz abiatu ziren. Bardeak herriarentzat direla aldarrikatzea izan zen lehen zeregina. Bertako tiro poligonora eta gastu militarrera bideratzen den dirua gastu sozialentzat izatea eskatu zuten. Tuteran geldialdia egin zuten, En Marcha / En Acción Siriako errefuxiatu taldeak prestatutako bazkariaz gozatzeko.

#EhKarabana llega a las Bardenas para denunciar que aquí empiezan las guerras. #GerraHauekOsoGeureakDira @ArabaOee @errefuxiatuakB @MugakZabalduz @Luarby @2018Bardenas @otero_mikel pic.twitter.com/zztQ8AkAIm

— RefugiadxsGipuzkoa (@onetergi) 29 de abril de 2018

Arratsalderako, hiru autobusak eta gainontzeko kideak Gasteizen ziren. Eskola segregazioak suposatzen duenaren inguruan hausnartu zuten, hezkuntza munduko eragileekin. Biharamunean, fokua Mendebaldeko herritarrongan jarri zuten, jatorri ezberdinetako herritarrekin jarrera zapaltzailea dugula ohartaraziz. Eusko Legebiltzarraren aurrean elkarretaratzea egin zuten eta EH Bilduko nahiz Elkarrekin Podemoseko legebiltzarkideek errefuxiatuen aldeko bandera eskegi zuten balkoietan.

Gasteiz-Bilbo-Zierbena. Lotsaren harresia eta armagintza industria

Gasteizetik Bilbora joan ziren. Azken eguna izanagatik ere, oraindik energiaz gainezka ziren parte-hartzaileak, Bilbo ingurukoa baitzen egun handia. Hileta-martxa egin zuten Plaza Biribiletik Atzerritarren Bulegoraino, Gobernu Zibiletik pasatuta. Etorkinen legearen ondorioz hildakoen hilotzak bulegoaren atean jarri zituzten. Jende andana bildu zen ibilbidean zehar eta migrazio politikaren aukako oihuak behin eta berriz haizatu zituzten.

Portugaleten bazkaldu ostean, Zierbenako portuan zuten hurrengo zita. Lau metroko harresi bat eraiki berri dute portuan, migratzaileak Erresuma Batura iristea ekiditeko. Hainbat saiakera eta hutsegiteren ostean, egun Zierbenako errefuxiatu kanpalekuan 40-50 gazte albaniar daude. Horietako batek kontatu du belauna apurtu zuela harresia gainditzeko saiakeretako batean. Karabanarekin albaniar ugarik bat egin zuten, gehienak 20-26 urte bitartekoak, eta Santurtzirainoko giza-katea osatu zuten lotsaren harresiari begira.

Pertsonen zirkulazio askea ekiditen den arren, armek ez dute harresirik Santurtziko Portutik Arabia Saudira iristeko. “Santurtzitik hilero armez betetako barku bat ateratzen da Arabia Saudira. Gure bonbak eta gure armak eramaten ditu eta zuzen-zuzenean doaz Yemengo gerrara”, azpimarratu zuen Itziar Fernandezek ekitaldi amaieran.