"Egia zor digute, informazioa, herritarron galdera eta aldarrikapenek erantzunak merezi dituzte". Horra zer berresten duen Zaldibar Argitu plataformak agiri bidez. Ehun egun pasa dira Zaldibarko zabortegiko luizia gertatu zenetik eta Alberto Sololuze eta Joaquin Beltran langileak zabor artean desagertu zirenekin. Bi desagertuen gorpuak atzematea "lehentasuna" izan behar dela oroitarazten du plataformak, horren alde "buru-belarri ezartzea" eta "behar diren baliabideak" exijituz.

"Berriz ez gertatzeko bermeak"

Gertatutakoa "berriz ez gertatzeko bermeak" galdetzen ditu Zaldibar Argitu-k. Hondakinen kudeaketak esku pribatuen esku ezin duela egon argi du plataformak: "Hondakinen kudeaketa ezin da saldu, ezin da dirua sortzeko makina bilakatu, ezin ditu batzuen interesak eta besteen diru goseak elkartu". Kudeaketa "publikoa, zentzuzkoa eta zuzena" aldarrikatzen du plataformak.

Otsailaren 6an gertatu zen ezbeharra eta laster etorri zen koronabirusaren izurriteak ondorioztatu konfinamendu garaia, egia eta erantzunak jasotzeko asmoz bideratu presio sozial eta herritarraren bidea doi bat zailduz. Manifestazioa egin zuten otsailaren 15ean, "Zaldibar argitu orain, egia zor digute orain" lemapean. Leihoetatik eta balkoietatik elkartasun mezuak helarazteko ekimena ere antolatu zuen plataformak apirilean, konfinamendu garaian.