Lehenbiziko informazioa gaur, ekainak 7, kaleratu dute hiru hedabideek. Bertan irakur daiteke Espainiako errege-familiako lau kidek PPren gobernuak 2012an ezarritako amnistia fiskal polemikoa baliatu zutela Suitzako bankuetan gordetako lau milioi euro erregularizatzeko. Aipatutako borboitarrek dirutza horren %2 baino gutxiago ordaindu zioten guztira Ogasunari, amnistia iragartzean Cristóbal Montoro ministroak adierazi arren hura erabiltzen zutenek %10 ordaindu beharko zutela.   

Diagonal, La Marea eta eldiario.es-ek azaldu dutenez, “Castellanako Paperak” filtrala.org webgunean jasotako 38.598 dokumentu dira, Castellana Pasealekuko hainbat aholkularitza enpresatan jatorria dutenak: adierazpen fiskalak, mezu elektronikoak eta bezeroei buruzko bestelako datuak.

Hiru hedabideetako kazetariek hilabeteak eman dituzte elkarlanean agiriok aztertzen. Haien bitartez agerian geratu diren praktikak ez dutela zertan legez kanpokoak izan azpimarratu dute; nolanahi, Ogasunarekiko zama arintzeko asmoz egindako jardunak izango dira beti ere egunotan argitaratuko diren informazioen ardatza. Zenbait kasutan, aitortu beharreko dirua zuzenean ezkutatzea barne. Iragarri dutenez, Castellanako Paperetan agertuko diren izenen artean Euskal Herrikoak ere badaude.