Libertimenduaren garaiari asteburu honetan emanen diote hasiera
Luhuson eginen dute aurtengo lehen libertimendua igande honetan. Ondotik, Amikuzeko, Garaziko, Irisarriko eta Esnazuko gazteek ere dute hitzordu hori biziaraziko. Iruñean ere errepikatuko dute hitzordua aurten ere.
Otsailean sartu gara eta iritsi zaigu Libertimenduaren aroa. Azken hilabeteetan ikusgarria sortzen, lantzen eta errepikatzen aritu ondoan, Luhusoko plazara aterako dira otsailaren 9an inguruko gazteak. Zerrenda luzeño baten hastapena, ondotik etorriko direlako beste batzuk: Amikuzen otsailaren 16an, Garazin otsailaren 23an, Irisarrin otsailaren 29an eta Esnazun martxoaren 1ean.
Dantza, herri antzerkia eta bertsoaren bidez, libertitzeko eguna izaten da Libertimendua. Mugarik gabeko kritikak botaz, botere harremanak iraultzeko xedez dabil Libertimendua.
Iruñean, otsailaren 23an
Aurten ere egingo dute Libertimendua Iruñea hirian. Iaz egin zuten lehen adikoz eta partehartzaileek gozamen handia harturik eta ikusleen plazera ere sorturik, errepikatzea erabaki dute. Hitzordua otsailaren 23an dute finkaturik.
Nehoiz baino negu epelagoa izanik ere, ihauteek udaberriari dei eginen diote. Ihauterietako asteburu gotorrena heldu da. Irisarrin Donibane Garazin, Donostiako Añorga auzoan edota Iruñean libertimenduak izanen dira, Irurin maskaradak eta Lapurdiko hamaika herritan... [+]
Libertimendu sasoi betean gara. Hartara, Euskal Herriko hainbat txokotan dantza, musika, antzerkia eta bertsoa uztartzen dituzten joko hauetaz gozatzeko garaia izateaz gain, aste hauek izaten dira momentu aproposena ere disziplina honi buruzko gora-beherei erreparatu eta... [+]