Aske geratu da Jabier Salutregi zazpi urte eta erdiko zigorra bete ostean

  • Egin egunkaria zuzentzeagatik zigortu zuten 18/98 makrosumarioan. Europan espetxeratuta dagoen hedabide bateko zuzendari bakarra aske geratu da gaur goizean espetxealdia hiru alditan bete ostean. Ean (Bizkaia) egingo diote harrera 19:00etan.


2015eko urriaren 29an - 11:07
Goizeko 10:30etan atera da Salutregi Burgosko espetxetik. (Arg: Etxerat)

"Gogorra izan da, espero dut herri honek kartzelara etortzeari uztea", adierazi du Salutregik, "bitartean, behar denero etorriko gara". Familiak, lagunek eta lankideek egin diote harrera. Espetxe atarian zeuden besteak beste, Jose Luis Elkoro, Teresa Toda, Patxo eta Isidro Murga, Jexux Mari Zalakain, Martin Garitano eta Pablo Gorostiaga.

1998ko uztailaren 15ean itxi zuten Egin eta Egin-Irratia Baltasar Garzon epailearen aginduz. Epaileak, Egin ETAren parte zela argudiatu zuen, hortik aurrera erabiliko zen “dena ETA da” lelopean. “Ez ginela ausartuko uste zenuten?”, adierazi zuen Jose Maria Aznar Espainiako presidenteak Eginen itxieragatik galdetu ziotenean.

Salutregik prozesuaren “kongruentzia eza” salatu zuen Vice Newsen Karlos Zurutuzari eskainitako azken elkarrizketan. “Eginek ETAri ekonomikoki laguntzen ziola esan zuen Garzonek, egun batzuk beranduago alderantzizkoa, eta azkenean iruzurrezko porrota argudiatu zuen”. Salutregi egunkaria itxi eta egun batzuetara atxilotu zuten. Ez zuten jakin zehazki zein zen akusazioa 2005ean epaia hasi zen arte.

Hedabidea itxi eta zazpi urtera epaitu zituzten Egin egunkariaren argitaratze enpresa eta haren arduradunak 18/98 makrosumarioaren barruko Orain S.A. sumarioan. 2009an emandako epaian, Eginen jarduna legezkoa zela ebatzi zuten eta egunkaria ez zela itxi behar. Ordurako baina, egunkariaren instalazioak egoera oso txarrean zeuden. Salutregik berak baieztatu zuen hori 2003an Hernaniko Eziago poligonora lehen aldiz sartu ostean.

Itxiera agindua baliogabetu bazen ere, akusatuak kolaborazioagatik zigortu zituzten: Salutregiz gain, Xabier Alegria , Jose Luis Elkoro, Carlos Trenor, Teresa Toda, Manuel Intxauspe, Isidro Murga, Patxi Murga, Jexux Mari Zalakain, Pablo Gorostiaga, Xabi Otero eta Iñaki Zapiain. Gehienak azken bi urteetan geratu dira aske. Trenor oraindik espetxean dago. Baita, sumario horretako beste ataletan zigortutako hainbat lagun ere.

Babes adierazpenak

Itxierak protesta ugari sorrarazi zituen Euskal Herrian eta milaka pertsonek euren babesa adierazi zieten. Salutregik berak 1998ko uztailaren 18ko ekitaldian hartu zuen parte. Idazleen Mundu Erakundeak (PEN) Salutregi eta Todaren kartzelaratzeak salatu zituen 2008an Glasgowen egindako urteko bileran. 2013an Gipuzkoako Aldundiak Urrezko plaka bana eman zien Egunkaria eta Egin egunkariei.

Europan egunkari bateko zuzendaria espetxean egotea ez da oharkabean joan nazioarteko hedabide batzuentzat. Al Jazeerak erreportaje bat argitaratu zuen euskal hedabideen aurkako epaiketen inguruan. Euskal Herrian eta espainiar estatuan ostera, Salutregik zenbait kazetariren isiltasuna kritikatu zuen: “Herrialde bananeroetan hedabide eta kazetariak jazartuak direnean sumintzen diren horien isiltasuna”. Martin Schenin NBEn errelatoreak espainiar estatuak terrorismoaren definizioari jartzen dizkion mugak salatu zituen, zehazki editorial, hedabide eta elkarteen kasuan.

Egin itxi zutenean, Euskadi Informacion hasi ziren argitaratzen. Bitartean Eginen bidea jarraituko zuen hedabide bat sortzeko prozesua abiatu zuten. Sei hilabete geroago Garak hartu zuen testigua.


Kanal honetatik interesatuko zaizu: Egin
Jabier Salutregi hil da, 'Egin' zuzentzeagatik preso izan zuten kazetaria

1998ra arte izan zen zuzendaria Egin egunkarian, Baltasar Garzonek ixteko agindua eman zuen arte. Zazpi urteko espetxealdia bete zuen Burgosko kartzelan, 2015 aske geratu zen. 73 urterekin hil da Donostiako bere etxean, azken hilabeteetan pairatu duen gaixotasun baten ondorioz.


2021-03-09 | ARGIA
Pepe Rei hil da, ikerketa kazetaritzaren erreferentea Euskal Herrian

Pepe Rei kazetaria 73 urterekin hil da, astearte honetan, Donostian. Egin egunkariko ikerketa taldea martxan jarri eta Ardi Beltza aldizkaria sortu zuen, besteak beste. Euskal Herriko eta Espainiako estolderia politikoez, gerra zikinak ustelkeriarekin eta narkotrafikoarekin zuen... [+]


2019-07-15 | ARGIA
21 urte Aznarrek Egin egunkaria itxi zuenetik

Astelehen honetan 21 urte betetzen dira Aznarrek Egin egunkaria indarrez itxi zuenetik. 1998ko uztailaren 15eko goizean Baltasar Garzón epaileak Egin egunkaria eta irratia ixtea agindu zuen, eta zuzendaritzako zein administrazio-kontseiluko hainbat kide atxilotu zituzten.


2019-05-03 | Aiaraldea
Omenaldi jendetsua egin diote Isidro Murgari

Iragan larunbatean zendu zen Isidro Murga. Gaur arratsaldean omenaldi jendetsua egin diote Egin egunkariko sustatzaile eta herri mugimendu ugaritako kidea izan zenari. Laudioko Lamuza parkean egin dute ekitaldia, eta ehunka herritar bertaratu dira zitara, gizarte eta politika... [+]


2018-07-22 | Axier Lopez | ARGIA
20 urtez adierazpen askatasuna jo-puntuan

“Goizero-goizero amosal bonba txiki batek, 50 bat gramokoa, eztanda egiten du Euskadin: Egin egunkaria”. Hala zioen Eusko Jaurlaritzako Barne Sailburu Juan  Mari Atutxak 1996an, gaur egun arte luzatu den ‘Dena da ETA’ teoriari ateak irekiz.


Eguneraketa berriak daude