Aske geratu da Jabier Salutregi zazpi urte eta erdiko zigorra bete ostean

  • Egin egunkaria zuzentzeagatik zigortu zuten 18/98 makrosumarioan. Europan espetxeratuta dagoen hedabide bateko zuzendari bakarra aske geratu da gaur goizean espetxealdia hiru alditan bete ostean. Ean (Bizkaia) egingo diote harrera 19:00etan.

Asier Arrate Iruskieta @AsierArrate
2015eko urriaren 29a
Goizeko 10:30etan atera da Salutregi Burgosko espetxetik. (Arg: Etxerat)

"Gogorra izan da, espero dut herri honek kartzelara etortzeari uztea", adierazi du Salutregik, "bitartean, behar denero etorriko gara". Familiak, lagunek eta lankideek egin diote harrera. Espetxe atarian zeuden besteak beste, Jose Luis Elkoro, Teresa Toda, Patxo eta Isidro Murga, Jexux Mari Zalakain, Martin Garitano eta Pablo Gorostiaga.

1998ko uztailaren 15ean itxi zuten Egin eta Egin-Irratia Baltasar Garzon epailearen aginduz. Epaileak, Egin ETAren parte zela argudiatu zuen, hortik aurrera erabiliko zen “dena ETA da” lelopean. “Ez ginela ausartuko uste zenuten?”, adierazi zuen Jose Maria Aznar Espainiako presidenteak Eginen itxieragatik galdetu ziotenean.

Salutregik prozesuaren “kongruentzia eza” salatu zuen Vice Newsen Karlos Zurutuzari eskainitako azken elkarrizketan. “Eginek ETAri ekonomikoki laguntzen ziola esan zuen Garzonek, egun batzuk beranduago alderantzizkoa, eta azkenean iruzurrezko porrota argudiatu zuen”. Salutregi egunkaria itxi eta egun batzuetara atxilotu zuten. Ez zuten jakin zehazki zein zen akusazioa 2005ean epaia hasi zen arte.

Hedabidea itxi eta zazpi urtera epaitu zituzten Egin egunkariaren argitaratze enpresa eta haren arduradunak 18/98 makrosumarioaren barruko Orain S.A. sumarioan. 2009an emandako epaian, Eginen jarduna legezkoa zela ebatzi zuten eta egunkaria ez zela itxi behar. Ordurako baina, egunkariaren instalazioak egoera oso txarrean zeuden. Salutregik berak baieztatu zuen hori 2003an Hernaniko Eziago poligonora lehen aldiz sartu ostean.

Itxiera agindua baliogabetu bazen ere, akusatuak kolaborazioagatik zigortu zituzten: Salutregiz gain, Xabier Alegria , Jose Luis Elkoro, Carlos Trenor, Teresa Toda, Manuel Intxauspe, Isidro Murga, Patxi Murga, Jexux Mari Zalakain, Pablo Gorostiaga, Xabi Otero eta Iñaki Zapiain. Gehienak azken bi urteetan geratu dira aske. Trenor oraindik espetxean dago. Baita, sumario horretako beste ataletan zigortutako hainbat lagun ere.

Babes adierazpenak

Itxierak protesta ugari sorrarazi zituen Euskal Herrian eta milaka pertsonek euren babesa adierazi zieten. Salutregik berak 1998ko uztailaren 18ko ekitaldian hartu zuen parte. Idazleen Mundu Erakundeak (PEN) Salutregi eta Todaren kartzelaratzeak salatu zituen 2008an Glasgowen egindako urteko bileran. 2013an Gipuzkoako Aldundiak Urrezko plaka bana eman zien Egunkaria eta Egin egunkariei.

Europan egunkari bateko zuzendaria espetxean egotea ez da oharkabean joan nazioarteko hedabide batzuentzat. Al Jazeerak erreportaje bat argitaratu zuen euskal hedabideen aurkako epaiketen inguruan. Euskal Herrian eta espainiar estatuan ostera, Salutregik zenbait kazetariren isiltasuna kritikatu zuen: “Herrialde bananeroetan hedabide eta kazetariak jazartuak direnean sumintzen diren horien isiltasuna”. Martin Schenin NBEn errelatoreak espainiar estatuak terrorismoaren definizioari jartzen dizkion mugak salatu zituen, zehazki editorial, hedabide eta elkarteen kasuan.

Egin itxi zutenean, Euskadi Informacion hasi ziren argitaratzen. Bitartean Eginen bidea jarraituko zuen hedabide bat sortzeko prozesua abiatu zuten. Sei hilabete geroago Garak hartu zuen testigua.

ARGIAn egiten dugun kazetaritza independenteak bultzada merezi duela uste duzu?

Informazio askea lantzen dugu ARGIAn, langileok gara proiektuaren jabeak eta gure informazioen atzean ez duzu sekula multinazionalik, bankurik edo alderdi politikorik topatuko. Gure ustez, burujabetza guztien oinarrian dago informazio burujabetza, ezagutzen dugunaren gainean pentsatzen eta erabakitzen dugu. Horregatik diogu kazetaritza independentea dela demokraziaren oinarrietako bat.

Aldizkaria paperean etxean edo e-postan PDFan jaso nahi duzu? Pozik hartuko zaitugu ARGIAko komunitatean. ARGIAkoa izateko, nahi eta ahal duzun ekarpena egin dezakezu, eta bueltan egoki ikusten duzuna eskatu. Indartu dezagun indartzen gaituena!

Kanal hauetan artxibatua: Egin  |  Hedabideak

Egin kanaletik interesatuko zaizu...
2018-07-22 | Axier Lopez | ARGIA
20 urtez adierazpen askatasuna jo-puntuan

“Goizero-goizero amosal bonba txiki batek, 50 bat gramokoa, eztanda egiten du Euskadin: Egin egunkaria”. Hala zioen Eusko Jaurlaritzako Barne Sailburu Juan  Mari Atutxak 1996an, gaur egun arte luzatu den ‘Dena da ETA’ teoriari ateak irekiz.


2018-03-02
'Egin'-en dokumentu-funtsak Artxibo Historikora mugitzeari ekin dio Jaurlaritzak

'Egin' egunkariaren dokumentu-funtsak Hernanin zeukan egoitzatik Euskadiko Artxibo Historikora mugitzeari ekin dio Eusko Jaurlaritzako Kultura Ondarearen Zuzendaritzak. 1.000-1.500 kaxatan aterako dute materiala, argazkiz beteak gehienak.


2015-06-01 | Garazi Zabaleta
Isidro Murga
"Kartzelara eraman bagintuen ere, harro gaude bizitako historiaz"

8 urte preso egon ostean, ostegunean gelditu ziren aske Isidro eta Patxo Murga anaiak. 18/98 sumarioan auzipetuak, Egineko langileak izateagatik atxilotu zituzten 2007ko azaroan, eta 69 eta 70 urteko adinarekin utzi dute Leongo espetxea.


2015-03-23 | Igor Agirre
Pablo Gorostiaga aske geratu da
zortzi urteren ondoren

Igandean geratu da aske Pablo Gorostiaga Auzitegi Nazionalak 2007an espetxean sartu ondoren. Egin egunkariko administrazio kontseiluko kidea zen eta 18/98 makrosumarioarengatik egon da preso zortzi urtez.


2013-11-27 | ARGIA
Teresa Toda kazetaria aske geratu da

Teresa Toda Egin egunkariko kazetariak sei urte eman ditu espetxean. 18/98 makrosumarioan inputatu zuten. Goizeko 8:30ean atera da Kordobako kartzelatik.


2013-07-15 | Xuban Zubiria
15 urte bete dira gaur Garzonek Egin itxi zuenetik

Gaur bete dira 15 urte Baltasar Garzon epaileak Egin ixteko agindua eman zuenetik. ETAren menpe egotea leporatu zioten. Auzi horren ondorioz Eginen proiektuaren parte ziren hainbat kidek kartzelan jarraitzen dute, horien artean, Xabier Salutregi Egineko zuzendaria eta Teresa Toda zuzendariordea.


2005-07-18
"Egin" egunkaria eta irratia itxi zituztela zazpi urte bete dira
Joan den ostiralean (uztailak 15) zazpi urte bete ziren Espainiako Auzitegi Nazionalaren aginduz Egin egunkaria eta irratia itxi zituztela. Auzipetuak prentsaren aurrean agertu ziren larunbatean, bi komunikabideen itxiera salatzeko. Egineko zuzendariorde izan zen Teresa Todak azaldu zuenez, Madrilgo gobernu aldaketak ez du eraginik izan. Auzipetutako 15 lagunek epaiketarik gabe jarraitzen dute. Egin auziko defentsa abokatu Alvaro Reizabalen ustez udazkenean edo neguan hasiko da epaiketa.

2005-07-03
Eskerrik asko Euskal Herria (Jabier Salutregi. Argia, 1.681. zenbakia,1998ko uztailak 26)

Uztailaren 15a egun betza izan zen demokraziarentzat eta herri honentzat. Estatu espainiarrak, botereen arteko elkar jarduera susmagarrian, Euskal Herriaren zati bat mututzea erabaki zuen. Egineko Administrazio Kontseilu desberdinetako kideak izan diren hamaika pertsonen atxiloketak -ez zigorrak, ezta espetxeratzeak ere, atxiloketa soilak- egunkari honen eta Egin Irratiaren «behin-behineko itxiera» eragin zuen. Inork ez zituen Banesto eta Antena3 itxi Mario Conde atxilotu zutenean. Ezta... [+]

Eguneraketa berriak daude