Alarma-txirrinak entzuten hasi dira. Lehen gutxi baziren, Kennedytarren mamua agertu da Estatu Batuetako presidentetza-hauteskundeetarako urtebete eskas falta denean. Duela hilabete Robert “Bobby” Francis Kennedy Jr., Ethel eta Robert “Bob” Francis Kennedy Sr. zenaren semeak, familiaren “betiereko” Alderdi Demokrata utzi eta independente legez presidente-gai bihurtzen zela iragarri zuen. Independente-tasun horri zukua atera asmoz edo, ematen du, gainera, Declare your independence izan daitekeela haren kanpainaren goiburua. 

Inor ez du ezustean harrapatu iragarpenak; aspalditik ari zen RFK bidea egiten, eta zalantza bakarra zen kosta ahala kosta primariorik gabe Biden hautagai izendatzeko hautua egina duen aparatu demokratari desafio egingo ote zion, ala alderdia utziko ote zuen bere hautagaitza aurkezteko. Nahitaezko diru-bilketa, edonola ere, aspalditik abian jarria zuen, eta ez zihoan gaizki. Eta argitu da inkognita. 

Diru-bilketak jada aditzera ematen zuen itxarobide horrek izan du, seguruenera, RFK txertoen aurkako erdi-ero bat bezala irudikatuz barreiatu den karikaturak, batik bat pentsaera liberaleko giroetan. Baina, egia izanik bere ospearen zati handi bat txertoen aurkako militantziari zor diola, esan behar da, halaber, egungo panorama politiko estatubatuarrean aurkitu litekeen egitasmo aurrerakoienetakoa dela RFKrena, batez ere ingurumen-politiketan. Europako ezkertiar eta berde askorekin homologagarria, hein batean. 

Baina ez da hori alarma sutu duena. Entzun dira potoloagoak Bernie Sanders-en ahotik. Inkestak dira RFK arriskutsua izan daitekeela adierazten hasi direnak. Mundu guztiak egia eztabaidaezintzat jotzen du presidente-gai independente batek ezingo duela Etxe Zuriraino heldu. Baina inkestek, batez ere benetan erabakigarriak izan ohi diren bospasei estatuetan, RFKri ehuneko 20tik gorako emaitzak ahalbidetzen dizkiotela ikusteak, sutan jarri ditu kalkulagailu demoskopikoak. 

Nori kalte eta, bidenabar, nori mesede egingo liokeen horrek da kontua. Eta Ross Perot-en aurrekaria hizpide da jada. Hasiera batean, RFKren esparru politikoa “txertoen aurkakoen zoro-mundura” mugatu behar zuela eta, bide batez, Trumpen hauteslerian kalte gehiago egingo zuela Bidenenean baino zeritzoten analisi interesatuek, jabetu behar izan dute beste faktore batzuk ere jokoan sartzen ari direla: Bidenen lidergoaren ahultasuna, Ukraina eta Palestinako gatazkek jendartean erein duten ezinegona eta sumina, abortu-eskubidea, immigrazioa... 

Baita kalamuaren legalizazioa ere. Eta horretaz, lehen eskuko ezaguerarekin hitz egin dezake RFKk.