Ia 30 urte pasa dira ordenagailu pertsonala merkaturatu zenetik. Datorren urtean ospatuko da ordenagailuak gure etxeetara heldu eta gure eguneroko bizitzaren parte izaten hasi ziren 30 urteurrena. Azken urteetan gainera, ordenagailu eramangarriak eta netbookak sortu dira.

Urteurrena gogoz hartzeko, Steve Jobs, Appleko lehendakariak, PCaren etorkizunari buruz hitz egin du konferentzia batean. Ondorengoa azaldu du: “Ordenagailu pertsonalak egongo dira, baina herritarren kopuru txiki batek erabiliko ditu soilik. Aldaketak urduri jartzen gaitu, PCa urte askotan gurekin egon delako. Post PCari buruz hitz egitea gustatzen zaigu, baina benetan hastea enbarazua da askorentzat”. Bere iritziz, Applek sortutako iPada eta antzeko teknologiak izango dira ordenagailuaren lekua hartuko dutenak.

Hori propaganda hutsa izan daitekeela pentsa dezakegu, baina datuek oso oker ez dabilela azaldu digute. Bi hilabetetan mundu osoan zehar bi milioi iPad saldu dira, gainera, Dell bezalako beste hainbat fabrikatzaile PC tabletak (iPad-aren antzekoak) kaleratzekotan daude. Horiek Google-k garaturiko Android sistema operatiboa izango dute. PC tabletek salmenta bikaina izango dutela dirudi gainera.

Morgan Stanleyk egindako azken ikerketak Jobsen iragarpena baieztatzen du. Interneteko konexioa duten mugikorren hedapena ordenagailu pertsonalena baino handiagoa dela azaltzen du ikerketak. Horren ondorioz, ondoko iragarpena egiten du: 2012an interneteko konexioa duten mugikorrak eta smartphone-ak ordenagailu eramangarri eta mahai gaineko ordenagailuak baino gehiago izango direla. Berak dio, bost urteren buruan, pertsona gehiago konektatuko dela internetera mugikorretik ordenagailutik baino.