Sinatzaileen ustez, Garzon ez da gai, alderdi moraletik begiratuta, torturaren prebentzioan lan egingo duen erakunde bateko kide izateko. "Audientzia Nazionaleko epaile zenean –1988 eta 2010 urteen artean– inkomunikazio egoera aplikatu die ehunka atxiloturi. Askotan salatua torturaren izate hutsa ahalbidetzen eta oinarrizko eskubideak murrizten dituen inpunitate eremu gisa", dio manifestuak.

Diagonal egunkariak dioenez, TPEBn ez daukate ordezkaririk Espainiak, Moldaviak eta Bosnia-Herzegovinak, eta hori konpondu nahi luke Espainiako Gobernuak Baltasar Garzon aurkeztuz postu horretarako. Beste bi pertsona ere aurkeztu dituzte (Miriam Cugat, Bartzelonako Unibertsitate Autonomako Eskubide Penaleko irakaslea; eta Carlos Fernande Liesa, Carlos III unibertsitateko katedratiko eta idazkari orokorra), baina Auzitegi Nazionaleko epaile ohia aurkeztu zuten lehen postuan, eta Gobernuaren hautagairik gustukoen bezala, beti ere, Diagonalek dioenez.

Aipatu Batzordeak, kide diren herrialdeetako kartzelak eta atxiloketa eremuak inongo murrizketarik gabe ikuskatzeko eskubidea du, eta nahiz eta ez duen inor zigortzeko eskumenik, beren kritika eta aholkuek pisu eta oihartzun handia izaten dute.

Facebooken epaile ohi espainiarraren hautagaitza babesteko taldea sortu dute, emailak bidaliz epaimahaia presionatu asmoz.