18/98 auziak behartu ditu elkartzera. Bakoitzak berea egingo balu, askoz ahulagoak lirateke. Baina ez da erraza 52 lagun horrela biltzea, are zailagoa horrelako muturreko egoera batean. Askok ez zuten elkar ezagutzen auzia hasi baino lehen, adinean alde handiak daude, baita jarreratan, erreakzioetan, iritzietan… ere. Baina erabaki bateratuak hartu behar dituzte. Eta hala egin dute azken 15 hilabeteetan.

Euren artean batzuekin harreman estuagoa dute besteekin baino. Aipatu ditugu Santutxukoak, eta emakumezkoen artean ere, esaterako, harreman berezia dago. Baina oro har denen artean lotura berezia dago. Eta haiek ere harritu egiten dira lortutakoarekin.

Enrique Molina fiskala ere konturatu da auzipetuen arteko elkartasun bereziaz. 52 lagunentzat (hitzaren zentzu guztietan) 484 urteko espetxea eskatu du. Baina epaiketako perituen frogek ez diote laguntza handirik eskaini eta bere ondorioak epaimahaiari azaltzeko orduan, elkartasun hori erabili du bere tesia arrazoitzeko: auzipetuen arteko harreman estuak frogatzen omen du hauek ETArekin duten lotura. “Elkartzera behartu gaituzte eta orain hori ere gure kontra erabili nahi dute”.

Auziari buruz ARGIA aldizkariak argitaratutako erreportajea irakurri eta argazki galeriak ikusi: 'Epaiketaren 50. bidaia' eta '15 hilabete Madrilen eta hemen'.