95 milioi euro aurreztu nahi ditu 2012an Jaurlaritzak. Sindikatuek jada lanuzteak iragarri dituzte datozen asteetan.

Neurri horietan langile publikoei gehien eragingo diena gaixoaldi laburretan soldatak murriztearena izango da. Orain arte, lanera joaten ez zen lehen hiru egunetan, soldata osoa jasotzen zuen gaixotutako langileak –sektore pribatuko enpresa gehienetan bezalaxe–; hemendik aurrera soldataren %50 baino ez du jasoko lehen hiru egun horietan. Idoia Mendia Jaurlaritzako bozeramalearen esanetan absentismo "jasanezina" saihesteko neurria da honakoa. Bestalde, Mendiak azaldu zuenez, Espainiako Gobernuak onartutako asteko lanaldiaren luzapena Eusko Jaurlaritzako langileei eragiten ote dien aztertzen ari dira.

Sindikatuek gogor egin diote Jaurlaritzaren dekretuari. ELAren esanetan "Jaurlaritzak langileei inoiz egin dien erasorik latzena" da. Bere esanetan administrazioko langileak "jo puntuan" jarri nahi ditu baja gehiegi hartzen dutela esanez "horrelako abusuen adibiderik aipatu ez badute ere". LABek ere gogor salatu ditu murrizketak eta Jaurlaritzak "langileen kontura dirua lortu" nahi duela esan du. Sindikatuek jadanik iragarri dute lau orduko lanuztea deituko dutela otsailaren 9rako eta atzo ELA, LAB eta STEE-EILASek bilkura egin zuten Lakuan protesta egiteko.