Bortxaketa delituaren definizioa eztabaidagai Europako Parlamentuan
Mintzagai izan dute Europako Parlamentuan pasa den apirilaren 26an “La Manada” kasuaren gainean Nafarroako Auzitegi Probintzialak emandako sententzia. Honetan, 2016ko Sanferminetako eraso matxista sexu eraso delitutzat jo ordez, sexu abusutzat jotzen da, bortxaketarik egon ez zela argudiatuz. Arrazoia, epaileen arabera, Kode Penalak eraso bat bortxaketatzat jotzeko kriterio bezala darabiltzan indarkeria eta larderia Sanferminetako kasuan eman ez zirela da.
Asteazkenean egindako osoko bilkuran Espainiak bortxaketa delituaren definizioaren gainean egiten duen nazioarteko estandarren aplikazioa izan dute mintzagai, eurodiputatuek gaia osoko bilkuran barne hartzearen alde bozkatu ostean. 188 diputatu agertu ziren gaia osoko bilkuran jorratzearen alde, 136 kontra eta 20 abstenitu egin ziren.
Bileran adostu zutenez, sexu indarkeria kasuak honen baitan ematen den larderia edota indar graduaren arabera ebaluatzea ekidin beharra dago. Baimendutakoak ez diren sexu harremanak bortxaketa gisa aitortzearen alde lan egitearen beharra azpimarratu zuten eurodiputatuek, baita indarkeria sexuala ebaluatzerakoan hau pairatzen duenak izandako erreakzioa zein erasoari aurre egiteko honek erabili duen indarrari erreparatzeari uzteko premia ere. Izan ere, erasoa ebaluatzeko berau jasan duen pertsonaren erreakzioa ebaluatzeak erasoaren gaineko erantzukizuna beronengan jartzen du, kontutan hartu gabe bortxaketa kasuetan biktimaren inmobilizazioa ohikoa dela. Hau azpimarratzera datoz asteazkenean bertan sexu erasoa "abusutzat" hartzearen kontrako testu bateratua publiko egin zuten osasun mentaleko 1.800 profesionaletik gora.
Parlamentuko eztabaidan zehar sexu indarkeria kondenatzearen, zuzenbide alorreko langileei genero ikuspegidun formazioa izatea exijitzearen eta bortxaketaren definizioa Istanbuleko hitzarmenak xedatutakoaren arabera (lege espainiarraren kontrara erasoan eman den larderia edota indarkeriaren araberakoa ez dena) egokitzearen alde agertu dira.
Europar Parlamentuan osoko bilkura ematen ari zen ia une berean NBE Emakumeak-eko koordinatzaile exekutibo Purna Sern-ek, plazaratutako komunikatu batean, “La Manada” auzikoa bezalako sententziek bortxaketen larritasuna gutxiesten dutela adierazten zuen. Azpimarratzen zuen, baita ere, horrelako erresoluzio judizialek emakumeen eskubideak errespetatzeko dauden betekizunen haustea suposatzen dutela.
Amnistia Internazional-ek, bestalde, ohartarazi du soilik sei estatuk jotzen dituztela bortxaketatzat baimenik gabeko sexu harremanak. Estatu horiek Erresuma Batua, Belgika, Luxenburgo, Alemania, Zipre eta Irlanda dira.
Atzo eguerdian, Mañeruko herriko plazan egindako ekitaldian, diploma bana eman zieten zortzi eta hamabi urte arteko ibarreko 45 haur euskaldunei. Horretaz gain, Oskar Alegriak umeokin ondutako film laburra estreinatu zuten.
