Ane Irazabal: “Biziki eragin didan gaia da errefuxiatuena”
Freelance moduan aritzen da lanean Ane Irazabal, azken urteetan Ekialde Hurbilean batez ere. Baina azken urte eta erdian euren herrialdeetatik ihesi Europara datozen errefuxiatuen aferan murgildu da.
Errealitate gordina gure etxeetaraino ekarri digu, haien testigantzak jaso ditu, gure kontzientziak astindu... eta egindako lan horregatik jaso du 2017ko Prentsako Argia Saria. “Poztasun eta ilusio handiarekin jaso dut saria –dio kazetariak–, nire lanagatik jaso dudan lehen saria da, eta freelance kazetaria naizen heinean bultzada emozional polita da”. Pertsonalki “biziki” eragin dion gaia dela diosku, erreportajeetan “ni naizenetik asko” dagoela, eta han gertatzen ari dena ahalik eta modu zintzoenean kontatzen ahalegintzen dela.
Irazabalek bezala beste hainbat kazetarik egindako lanagatik lortu dugu, ez errefuxiatuen azalean jartzea, baina bai hobeto ulertzea inguru haietan gertatzen ari dena. Horretarako, kazetariok “gure begiez ikusi behar dugu egoera, jendearekin hitz egin, giroa sentitu, usainak arnastu...”. Eta hala, trabak traba, han nolabait gure begiak izatea lortu du kazetari arrasatearrak.
