Euskal Herriko Eskubide Sozialen Kartak deituta, “Publikoa, funtsezkoa zaindu, aberastasuna banatuz. Lehenik bizitza” leloarekin, Hego Euskal Herriko hiriburuetan mobilizatu gara goizean. Bada, arratsaldean, eskualde guztietan egin ditugu mobilizazioak; ia 50 herri eta hiritan. Hala, normaltasunera itzuli nahi ez dugula berretsi dugu, ezta ustezko normaltasun berri batera jauzi egin ere. Izan ere, "ordena berri" hori salbuespen-egoera eta alarma etengabea da langile eta sektore kolpatuenentzat; krisialdi iraunkorra da okerren dauden pertsonentzat. Horregatik, ezinbestekoa da aldaketa sozialean oinarritutako eta pertsona guztien duintasuna eta eskubideak lehen lerroan jarriko dituen eredu baterantz urratsak egiten jarraitzea.