Aste honetako atalean Beit Sahourrera joan gara, Bethlehemeko eskualdera, telefono bidezko konexioan. Bertan bizi da duela 30 urtetik gora gure kolaboratzaile beteranoetako bat, Juani Rishmawi. Rishmawi Health Work Committees erakundeko langilea da; Zisjordanian, Gazan eta Jerusalemen zabalduta dagoen osasun arloko erakundea. Osasungintzan duen eskarmentua kontuan hartuta, haren eskutik ezagutu nahi izan dugu koronabirusaren izurriteak eremu okupatuetan izan duen eragina. Kontatu digu betiereko konfinamendu eta mugimenduen murrizketa egoera larria areagotu egin dela krisialdi sanitarioagatik. Gainera, Bethelehem bezalako eskualdeetan eragin ekonomiko latza izan du, milaka familia turismotik bizi direlako. Bestalde, krisialdi politikoaz ere mintzatu zaigu. Izan ere, egoera gaiztotu egin da AEBek kolonoek okupatutako eremuak onartu  eta Golkoko monarkiekiko itunak izenpetu dituztenetik. Azkenik, berretsi du, krisialdi sanitarioa izanagatik, okupazioaren suntsipen-makineriak ez duela etenik izan: kolonien hedapenak jarraitzen du, eta baita kolonoek populazio palestinarraren kontra burututako erasoek ere. Eraso horiek olibaren uzta garaiaren testuiguruan areagotu dira, olibondoaren jarduera Palestinako ekonomia makalaren motoreetako bat baita.