Abenduarekin batera datorkigu negua. Hilabete honek ordea gure lurretan barrena izendapen ugari jaso ditu, eta denak ere neguari erreferentzia egiten diotenak dira: loia edo lotazila (lo egiteko hilabetea), neguila, beltzila edota hotzaroa. Gaur erabiltzen dugun abendu hitzak ordea beste esanahi bat du, beste modu batera baina neguarekin ere lotu dezakeguna, izan ere latinezko “adventus” hitzetik dator, “jainkoaren etorrera” esan nahiko lukeena. Neguak beraz, bere hasieran eten bat dakar, atseden bat eta lo zorro bat, batez ere gure inguruan nabarituko duguna. Eta baserriak historian zehar neguak zekarren eraldaketara egokitu behar izan du: hotzera, ilunera eta bustira alegia.